О́skemende órimdeı qyzdar buzaqylyq jasap, jaǵa ustatarlyq isteri qoǵam talqysyna túskeni áli umtyla qoıǵan joq. Saýda keshenderiniń birindegi ájethanada kolledjdiń 1-kýrs stýdentin birneshe qyz tepkige jyǵyp, májbúrlep sheshindirgeni, ony beınekameraǵa túsirgenderi eldiń esinde. Odan beri eki aıdan astam ýaqyt ótti. Tergeý isi aıaqtalyp, keshe sottyń birinshi otyrysy ótti.
Belgili bolǵandaı, jábir kórgen stýdentti bir top qyz, bir emes, birneshe ret soqqyǵa jyqqan. Onyń bári áleýmettik jelide taraǵan beınematerıaldarda aıdan anyq kórinip tur. Jasyryp-jabatyndaı emes. Alaıda, BAQ ókilderi resmı aqparatty qoǵamdyq pikir týyndatyp baryp qana ala alǵan edi. Oǵan deıin bilim berý mekemesiniń basshylarynan, quqyq qorǵaý organdarynan tarqatyp aqparat ala almaǵanymyz shyndyq. Qoǵamdyq pikirdiń ózin saralap, saraptap, súzip shyqsańyzdar, jábir kórgen qyzǵa qoldaý kórsetip, jyly lebizderin bildirgen. Al kúdikti tarapty zań aıasynda jazaǵa tartý kerektigin jazǵan. Sóıtip, qylmystyq is qozǵaldy. Eki aıdan astam ýaqyt tergeý júrgizildi.
Keshe shýly iske qatysty sot otyrysy ótedi dep, Shyǵys Qazaqstan oblysy kámeletke tolmaǵandardyń isteri jónindegi mamandandyrylǵan aýdanaralyq sotyna bardyq. Alaıda, sýdıa aıyptalýshy taraptyń jáne prokýrordyń usynysymen sot jabyq túrde ótedi degen sheshimge kelipti. Sebebi, kámelet jasqa tolmaǵan qyzdardyń psıhologııasyna nuqsan kelýi múmkin eken. Jábirlenýshi qyzdyń anasy men týǵan-týystary ǵana sottyń ashyq ótýin surady.
– Qyzymdy uryp, beınekameraǵa túsirgende kámelet jasqa tolmaǵandaryn bildi ǵoı. Onyń ústine, Aıaýlymnyń ata-anasynan basqasy keshirim surap kelmedi. Qyzym birneshe ret aýrýhanaǵa jatty. Áli kúnge deıin basym aýyrady deıdi. Sabaqqa barýǵa da zaýqy joq. Beınekameraǵa túsirip, abyroıyn aırandaı tókti. Endi sot ádil sheshim shyǵaryp, kúdikti qyzdar jazanyń eń qatań túrin alsa eken, – deıdi jábirlengen qyzdyń anasy Almıra Dosymova.
Aıtqandaı, sot budan bylaı jabyq ótedi. Prokýratýra ókili túsindirgendeı, sot sheshimi shyqqan soń istiń búge-shigesi resmı túrde habarlanady. Al halyqtyń kútkeni – ádil sheshim.
О́skemen