Memleket basshysy Sheteldik ınvestorlar keńesiniń otyrysynda sıfrlyq tehnologııalardyń áleýetine toqtaldy, dep habarlaıdy Egemen.kz Aqorda baspasóz qyzmetine silteme jasap.
«Sıfrlandyrý tutas elder men óńirlerdiń básekege qabilettiligin anyqtaýshy faktorǵa aınaldy. 2025 jylǵa qaraı álemdegi sıfrlyq naryq 50 paıyzǵa artyp, 6,8 trıllıon dollarǵa jetedi dep boljanyp otyr. Boljam boıynsha 10 jylda álemdegi taýar óndirisi men kórsetiletin qyzmetterdiń 70 paıyzynda sıfrlyq tehnologııalar qoldanylady», dedi Prezıdent.
Qasym-Jomart Toqaevtyń aıtýynsha, sıfrlandyrý Qazaqstan úshin ulttyq mańyzy bar máselege aınaldy.
«Bul úrdistiń Qazaqstan úshin asa mańyzdy ekenin anyq túsinemiz. Basqasha aıtqanda, sıfrlandyrý biz úshin ulttyq mańyzy bar máselege aınaldy. Biz Eýrazııadaǵy eń iri ári ozyq sıfrlyq habtardyń biri bolýdy kózdep otyrmyz. Taıaýda álemdegi 62 el Ortalyq Azııanyń ornyqty damýy úshin Qazaqstanda Birikken Ulttar Uıymynyń sıfrlyq sheshimder ortalyǵyn qurý týraly bastamasyn biraýyzdan qoldady. Muny bizge artylǵan zor senim jáne Qazaqstannyń álemdik arenaǵa shyǵýdaǵy mańyzdy kezeńi retinde qabyldadyq. Atalǵan ortalyq memleketter arasynda «sıfrlyq tosqaýyldardyń» paıda bolýynyń aldyn alýǵa baǵyttalǵan jahandyq, óńirlik jáne ulttyq múddeni jumyldyrýǵa arnalǵan», dep qosty Memleket basshysy.