Arqa tósindegi arý Astananyń sáni men sáýleti ǵana emes, kúnnen kúnge ınfraqurylymy da damyp, shahardyń órkenıet bıigine órlep bara jatqandyǵyn pash etedi. Jaqynda Esil ózeninde sý-kólik jolynyń ashylý saltanaty bolyp, 65 adamǵa arnalǵan alǵashqy keme saıahattyq saparǵa shyqty. Esil ózeniniń boıymen qaıyq júrgizip, jolaýshylar saıahatyn uıymdastyrý ıdeıasyn alǵash ret Elbasy aıtqan bolatyn.
Memleket basshysynyń tapsyrmasymen qala ákimdigi 2008 jyly Jolaýshylar kóligi jáne avtomobıl joldaryna qarasty “Esil-Astana” memlekettik mekemesin qurdy. О́tken jyldan bastap bul mekeme Esil ózeniniń boıymen qaıyqpen jolaýshylar tasymaldaý isin bastap ketti.
“Esil-Astana” memlekettik mekemesiniń dırektory Darhan Dosmaǵambetovtiń aıtýynsha, ótken jyly Esil boıymen qaıyq júrgizýdiń alǵashqy maýsymy sátti ótti. Jyl qorytyndysynda jazǵy demalys kezinde Esil ózeni arqyly qaıyqtarmen elorda sáýletin tamashalaýǵa 16 myńnan astam adam qamtylypty. Búginde atalmysh mekemede 5 qaıyq bar. Onyń úsheýi jolaýshylar tasymaldaýǵa, qalǵan ekeýi sýdan qutqarý qyzmetin atqarady. Bıyl Esilde qaıyqpen jolaýshylar tasymaldaý joly M-3 kópirinen bastap Telman kentine deıin uzartylǵan. Jalpy, jolaýshylardyń ózen boıymen saıahat jasaý saparynyń uzyndyǵy 12 shaqyrymdy quraıdy. “Esil-Astana” memlekettik mekemesi aldaǵy ýaqytta Germanııa men Reseıden taǵy da lıýks-klasty eki shaǵyn keme satyp alýdy josparlap otyr.
Qala kúni merekesi qarsańynda “Esil-Astana” memlekettik mekemesi qala turǵyndary men qonaqtaryn bas qalamyzdyń sáýletin jáne mańaıyndaǵy kórnekti oryndardy tamashalaýdy keńinen uıymdastyrýdy qolǵa aldy. Sý boıymen saıahat jasaıtyn qaıyqtan astanalyq saıabaqtan Shubar kenti arqyly Samal shaǵyn aýdanyndaǵy Kenesary eskertkishiniń tusymen, “Redıson” qonaq úıi, Aqorda rezıdensııasy janymen Telman kentine deıin sapar shegedi. Qala turǵyndary men bas qalamyzǵa kelgen qonaqtar sý joly arqyly saıahat jasaýdyń umytylmas áserine dán rıza.
Jylqybaı JAǴYPARULY.