Atyraýda da qazaq kúresine bet burǵan balýandar qatary kóbeıdi. Bul Astana kúni qarsańynda ótetin «Qazaqstan barysy» respýblıkalyq týrnıriniń irikteý kezeńinde baıqaldy.
Saıys bastalmas buryn 15 balýan qarsylasyn jerebe arqyly tańdady. Onyń ishinde 7 aýdannan 13, Atyraý qalasynan 2 balýan bar. Balýandar 92 kg-dan joǵary salmaqta baq synady.
«Qazaq kúresinde eptiler men kúshtilerdiń ǵana baǵy janady. Alaıda upaı sanymen alda turǵan balýannyń bir sekýndta utylyp qalatyn sáti jıi kezdesedi. О́ıtkeni tól sportymyzdyń osyndaı ereksheligi bar», deıdi aǵa jattyqtyrýshy Aıbek Serǵazıev.
Synǵa túsken balýannyń bári atalǵan kúrestiń ádis-tásilin jetik biledi. Máselen, Bekbol Muqashev sporttyń bul túrin bala kezinen serik etip keledi.
«Qazaq kúresimen 6 jasymnan beri shuǵyldanamyn. Maǵan jekpe-jek sportynyń bári unaıdy. Biraq kóńilim qazaq kúresine aýdy», deıdi B.Muqashev.
Bul saıysqa birneshe ret qatysyp, tájirıbe jınaǵan balýandar da bar. Sonyń biri 27 jastaǵy Arman Qalıev bıylǵy irikteý jarysyna tórtinshi ret qatysty. Ásirese dzıýdodan sport sheberi Ádilet Saparǵalıevpen beldesýi tartysty ótti.
«Sporttyq saıystyń bári de tartysty ótedi. Al qazaq kúresindegi beldesýdiń jóni bólek. Jartylaı fınaldaǵy beldesý ońaı bolmady. Ádilet – qazaq kúresin myqty meńgergen balýan. Buryn dzıýdodan Qazaqstannyń chempıony atanǵan. Bul kúreste samboshylar, dzıýdoshylar, basqa da jekpe-jek túrleriniń ókilderi baq synap júr. Biraq jeńilmeý úshin namysqa tyrystym», deıdi A.Qalıev.
Qarsylasynyń bárinen basymdyǵyn tanytqan A.Qalıev «Atyraý barysy» atandy. Oǵan úzdik balýan dıplomymen birge 500 myń teńgeniń sertıfıkaty berildi. Al ekinshi orynnyń júldesi – 300 myń teńgeni Qyzylqoǵa aýdanynyń balýany Bekbol Muqashev jeńip aldy. Úshinshi oryn men 200 myń teńgege Jylyoı aýdanynan qatysqan B.Shaǵataev ıe boldy.
Atyraý oblysy