Birikken kúres áleminiń (UWW) reıtıngi qaıta jańartyldy. Jer-jahannyń eń myqty balýandarynyń TOP-10-dyǵyna Qazaqstannyń toǵyz balýany endi. Eń úzdik kórsetkish Jámıla Baqbergenovaǵa tıesili. Qazaq qyzy qazirgi kezde 72 kılo salmaq dárejesinde beldesip júrgen burymdylar arasynda teńdessiz dep tanylyp otyr.
Árıne, Jámılanyń osyndaı bıik belesten kórinýi tegin emes. Alǵash ret osydan bes jyl buryn 23 jastaǵylar arasyndaǵy álem birinshiliginde bas júldeni oljalaǵannan keıin qyraǵy mamandardan bastap qatardaǵy kórermenderge deıin bul balýannyń ár qadamyn jiti qadaǵalaýda. Sol kezden beri Baqbergenova álem chempıonatynda eki ret kúmis medal ıelendi. 2021 jyly Oslodaǵy jarystyń fınalynda japonııalyq Masako Fýrýıtıden utylsa, 2022 jyly Belgradta amerıkalyq Elo Amıtke ese jiberdi. Azııa chempıonatynda ol bes júlde aldy. 2020 jyly Nıý-Delıde, 2022 jyly Ulanbatyrda jáne 2023 jyly Astanada altynnan alqa taqsa, 2021 jyly Almatyda kúmispen kúpteldi. 2019 jyly Sıanda qolaǵa qol sozdy. Dál sol jyly Konıada ótken Islam yntymaqtastyǵy oıyndarynda úshinshi orynǵa taban tiredi. Kúni keshe ǵana Jámıla Bishkekte jalaýy jelbiregen reıtıngtik týrnırde qarsylas shaq keltirmedi. Osyndaı orasan zor tabystarynyń arqasynda 27 jastaǵy qazaq qyzy álemdik reıtıngte jeke-dara kósh bastap tur.
Jámılanyń syńary Mádına Baqbergenovanyń da myqty balýan ekenin jankúıerler jaqsy biledi. 68 kılo salmaqta kúresip júrgen ol jastardyń álem (U-23) jáne qurlyq birinshilikterinde júldegerler qatarynan kórindi. Azııa chempıonatynda úsh ret oljaǵa keneldi. Byltyr Mońǵolııanyń astanasynda apaly-sińilili Baqbergenovalar birinen keıin biri qurlyqtyń basty dodasynyń altyn tuǵyryna kóterilgende qýanbaǵan, shattanbaǵan qazaq joq-aý, sirá! Turmysqa shyqqannan keıin Mádına kóp jarystarda boı kórsetken joq. Sol sebepti de bul joly ol reıtıngte úzdikter sanatyna qosyla almady.
UWW reıtınginde myqtylar qatarynda júrgen taǵy bir burymdymyz – Marına Sedneva. 55 kılo salmaqta beldesetin otandasymyz besinshi oryndy enshiledi. 27 jastaǵy sportshy jastardyń Azııa jáne álem birinshilikterinde (U-23) eki ret qola medal ıemdendi. Qurlyq chempıony (U-23) degen ataǵy bar. Bıyl ol da Bishkektegi reıtıngtik jarysta aldyna jan salmady. Ulty orys bolǵanymen, Marına osydan úsh jyl buryn qazaqtyń qutty shańyraǵyna kelin bolyp tústi. Onyń kúıeýi – elimizdiń tańdaýly erkin kúres sheberleriniń biri Nurqoja Qaıpanov. Qazir ekeýi ómirde de, sportta da qol ustasyp birge júr. Sóz oraıy kelgende Marınanyń qazaq tilin de jetik meńgergenin aıta ketken abzal. Sondaı-aq 59 kılo salmaq dárejesinde óner kórsetip júrgen 24 jastaǵy Dıana Qaıýmova da úzdik bestikti túıindep tur.
Osy sport túrin serik etken jerlesterimizdiń arasynan eń aýyr salmaqta kúsh synasyp júrgen 27 jastaǵy Gúlmaral Erkebaeva men 31 jastaǵy Elmıra Syzdyqovanyń jýyq arada TOP-10-nyń qataryna qosylýǵa jaqsy múmkindikteri bar. Ekeýiniń de qazirgi qarqyny jaman emes. Azııa chempıonattarynda tórt qolany qorjynǵa salǵan Gúlmaral 12-orynǵa jaıǵassa, Rıo Olımpıadasy men Azııa oıyndarynyń qola júldegeri, qurlyqtyń eki dúrkin chempıony jáne bes dúrkin júldegeri degen dardaı ataǵy bar Elmıra óziniń komandalyq áriptesinen eki saty ǵana tómen tur.
Áıelder kúresinen 10 salmaq dárejesi boıynsha júldeler sarapqa salynsa, sonyń úsheýinde Japonııa qurama komandasynyń músheleri aldaryna jan salar emes. Al qalǵan salmaqtarda tizgin AQSh, Ýkraına, Qytaı, Moldova, Ekvador, Qazaqstan jáne Mysyr eli ókilderiniń qolynda. TOP-10 balýannyń qatarynda da japondardyń qarasy mol. Kúnshyǵys eliniń 9 qyzy sol sanatta. Japonııadan Ýkraına, AQSh jáne Qytaı da qalysatyn emes. Olardyń árqaısysynyń 8 sportshysynyń tegeýrini óte kúshti. Sondaı-aq bul tizimde Mońǵolııanyń – 7, Kanada men Úndistannyń – 5, Polsha men Rýmynııanyń – 4, О́zbekstan, Qazaqstan, Moldova, Qyrǵyzstan, Bolgarııa, Fransııa jáne Túrkııanyń 3 burymdysy bar.
Sondaı-aq kúni keshe ǵana erkin kúres pen grek-rım kúresiniń de álemdik reıtıngi jańardy. Bul jańalyqty biz gazetimizdiń kelesi sandarynyń birinde jarııalaımyz.
Áıelder kúresinen álemdik reıtıngtegi úzdik úsh balýan
50 kılo: 1. Iýı Sýsakı (Japonııa), 2. Otgonjarǵal Dolgorjav (Mońǵolııa), 3. Anna Lýkasıak (Polsha).
53 kılo: 1. Lýsııa Iаmılet Epes Gýsman (Ekvador), 2. Domınık Olıvııa Perrısh (AQSh), 3. Bathýıagıın Hýlan (Mońǵolııa).
55 kılo: 1. Maıý Mýkaıda (Japonııa), 2. Lorena Karla Gonzales (Kanada), 3. Oleksandra Homenes (Ýkraına).
57 kılo: 1. Alına Grýshına-Akobııa (Ýkraına), 2. Helen Maroýlıs (AQSh), 3. Sýgýmı Sakýraı (Japonııa).
59 kılo: 1. Anastasııa Nıkıta (Moldova), 2. Greıs Iаkob Býllen (Norvegııa), 3. Sakýra Matokı (Japonııa).
62 kılo: 1. Kaıla Kollın Mırakl (AQSh), 2. Lýo Sıaoszıýan (Qytaı), 3. Aısulý Tynybekova (Qyrǵyzstan).
65 kılo: 1. Jııa Long (Qytaı), 2. Mıva Morıkava (Japonııa), 3. Mellorı Velte (AQSh).
68 kılo: 1. Amı Ishıı (Japonııa), 2. Tamıra Mensa-Stok (AQSh), 3. Chjoý Fen (Qytaı).
72 kılo: 1. Jámıla Baqbergenova (Qazaqstan), 2. Elo Amıt (AQSh), 3. Nıkoleta Anhel (Rýmynııa).
76 kılo: 1. Samar Hamza (Mysyr), 2. Iаsemın Adar (Túrkııa), 3. Genezıs Reasko Valdes (Ekvador).