Onlaın kúndeliktiń kóleńkeli tustary

Bul suraqtyń jaýaby «Egemen Qazaqstan» gazetiniń №110 (30589) sanynda jaryq kórgen «Bilim reformalary haqynda» maqalasynda aıtylǵan.

Maqala avtory Nurǵalı Mahannyń pikirinshe, «Bilim Land» arqyly oqýshy kúndeliginiń joıylyp, synyp jýrnalynyń elektrondy nusqaǵa kóshýi pedagogıka-psıhologııalyq turǵydan qate sheshim bolǵan. Mektep eń kemi 5G ınternetpen, oqýshylar 100 pa­ıyz kompıýtermen qamtamasyz etilgen jaǵdaı bolsa, áńgime bólek bolar edi. Orta eseppen 1 myń bala oqıtyn mektepte 170-250 oqýshy ǵana kompıýtermen qamtamasyz etilgeni kóńil kónshitpeıdi.

Osy tusta maqala avtory - joǵary sanatty sheber-pedagog «Bilim Land» arqyly oqýshynyń bilim deńgeıin anyqtaý qanshalyqty durys degen saýalǵa jaýap beredi.

«Synypta jýrnaldyń bo­lýy, sol jýrnaldyń sońǵy paraqta­ryn­daǵy oqýshy týraly tolyq málimet jáne oqýshyǵa kúndelikti baǵa qoıý mu­ǵa­limge oqýshylardy psıhologııalyq turǵydan tolyq zerttep bilýine múmkin­dik týdyratyn edi. Qazirgi muǵalim óz oqýshylaryn tulǵa retinde jeke zertteýi bylaı tursyn, olardy tolyq tanyp bilmeıdi de. Oǵan múmkindigi de, ýaqyty da tapshy», deıdi Nurǵalı Mahan.

Pedagogtyń aıtýynsha, synypta qarapaıym, biz biletin dástúrli jýrnal bolsa, oqýshy oǵan qoıylǵan baǵany óz kózimen kórip, sabaqqa qaraı bet burar edi.

«Jýrnal qolymyzda turǵanda toqsan sońynda oqýshydan aýyzsha ne jazbasha synaq alyp, «eger «4»-ke ne «5»-ke shyqqyń kelse, myna taqy­rypty oqyp kel», dep tapsyrma bere­tinbiz. Bul ádis balanyń bilimge degen yntasyna áser etetin. Qazir ol joq. Búkil mektepte ınternettiń 2-3 núktesi ǵana bar. Ol jerdegi muǵalimder arasyndaǵy kezektiń ózin aıtpaǵanda, mekteptegi ınternet núkteleriniń ózi kúndiz nashar, tek túnge qaraı jaq­sy jumys isteıdi eken. Bul jańa elektrondy júıe muǵalim men oqýshysy kompıýtermen tolyq qam­tamasyz etilgen, ınterneti múltiksiz jumys isteıtin elderge qolaıly shyǵar. Al bizdiń jaǵdaıda bul muǵalim psıhologııasyna áser etedi. Sebebi muǵalim jalaqysy «Kundelik.kz» ar­qy­ly toltyrylǵan jýrnal boıynsha esepteledi», dep túsindirdi avtor.

Taǵy da bir qyzyq jaıt, munda oqýshyǵa «2» degen baǵa qoıýǵa bolmaıdy eken. Eger mundaı baǵa qoıylsa, «Kundelik.kz» bazasyndaǵy tutas aýdan, qala berdi oblystyń bilim deńgeıiniń kórsetkishi túsip ketedi. Oqý­shyǵa qoıǵan «2» degen baǵa úshin pán muǵaliminen bastap, mektep ákimshiligi túgel «joǵarydaǵylardyń» aldynda jaýap beredi. Onyń ústine «Jańar­tylǵan oqý baǵdarlamasy» boıynsha oqýshyǵa «2» qoıý bylaı tursyn, «seniki qate», «durys emes» dep te aıtýǵa ruq­sat joq.

«Ustazdardyń júıkesin juqartyp otyrǵan taǵy bir másele - kásibı biliktiligin anyqtaý maqsatynda olardan alynatyn test-synaǵy. Any­ǵyn aıtqanda, muǵalimniń shyn bilim dárejesin test-synaqtary anyqtap bere al­maıdy. Menińshe, qaı zamanda da mu­ǵalimniń bilim deńgeıi oqytqan oqýshy­larynyń bilim kórsetkishterimen anyqtalǵan. Sondyqtan muǵalimniń deńgeıin oqytqan oqýshylarynyń bilim kórsetkishimen esepteý kerek. Ol úshin muǵalimniń 2-3 jyl sabaq bergen synybynan jazbasha jáne aýyzsha synaq alý jón bolar edi», deıdi maman.