Birinshi nesıe bıýrosy Analıtıkalyq ortalyǵynyń habarlaýynsha, elimizde tirkelgen jeke kásipkerlik sýbektileriniń sany kúrt ósti. 2023 jyldyń 1 sáýirindegi jaǵdaı boıynsha tirkelgen jeke kásipkerlik sýbektisiniń sany 1 mln 682,2 myńǵa jetip, byltyrǵy kórsetkishten úshten birge artyq bolǵan (384,4 myń kásipker).
Absolıýtti mándegi jyldyq ósim sońǵy tórt jylda rekordty kórsetkishke ıe. Sondaı-aq 12 aıda zańdy tulǵalar sany da 6 paıyzǵa (30,1 myń birlikke) artyp, jalpy sany 513,6 myńǵa jetken. Ázirge ósim draıveri shaǵyn bıznes bolyp tur. Zańdy tulǵalardyń 98 paıyzdan astamy osy segmentke tıesili.
Zańdy tulǵalardyń jyldyq ósiminiń 40 paıyzdan astamyn (12,4 myń birlik) sheteldik menshik ıeleri qalyptastyrǵan. Sheteldik kásiporyndardyń dál bulaı úlken úlespen tirkelýi sońǵy bes jylda alǵash ret bolyp otyr.
«Jalpy, bul rezıdent emesterdiń qazaqstandyq ıýrısdıksııaǵa qyzyǵýshylyǵy artqanyn ańǵartady. Áńgime jalǵyz ózi-aq sheteldik kásiporyndardyń jyldyq ósiminiń 70 paıyzyn (8,7 myń birlik) qamtamasyz etken Reseı týraly bolyp otyr», dep málimdeıdi Birinshi nesıe bıýrosy.
2023 jyldyń birinshi toqsanynda ótken toqsanmen salystyrǵanda sheteldik kásiporyndar ósiminiń tómendeýi 40 paıyzǵa jýyq bolypty. Munyń aldynda úsh toqsan qatarynan ósim baıqalǵan. Demek sheteldik kásiporyndar tarapynan Qazaqstanda tirkelýge degen suranys azaıyp jatyr degen sóz.
«Sońǵy úsh jylda tirkelgen zańdy tulǵalardyń jalpy sanyndaǵy operasııalyq kompanııalardyń úlesi 10,7 paıyzdyq tarmaqqa ósti. 2023 jyldyń 1 sáýirindegi jaǵdaı boıynsha ol sońǵy bes jyldaǵy maksımýmǵa – 80,6 paıyzǵa jetti. Bir qyzyǵy, Reseıdiń rezıdentteri tirkegen 10 zańdy tulǵanyń tek bireýi ǵana, Qytaıdyń tórteýi taratý úderisinde», deıdi analıtıkter.
2022 jyldyń qorytyndysy boıynsha zańdy tulǵalardyń tirkelý sany sońǵy bes jyldaǵy maksımýmǵa jetti – 51,5 myń birlik. Eń kóp kásiporyn birinshi toqsanda tirkelgen – 12,4 myń. Alaıda aldyńǵy toqsanmen salystyrǵanda kórsetkish 10 paıyzǵa nemese 1,3 myń birlikke qysqarǵan.