О́rtke qarsy qyzmet komıtetiniń tóraǵasy Nurbolat Derbisov Abaı oblysyndaǵy órt búgin-erteń tolyq óshirilýi múmkin ekenin aıtty. Qazirgi ýaqytta órttiń negizgi oshaqtary tolyq baqylaýǵa alynǵan, dep habarlaıdy Egemen.kz.
Úsh baǵyttaǵy órt oshaqtarynyń eń negizgisi Shúlbi stansııasynyń mańaıynda ornalasqan. О́rt sóndirýshilerdiń basym bóligi sol jerge jumyldyrylyp, Tótenshe jaǵdaılar qyzmetkerleri men áskerıler jalynnyń Shúlbige deıin jetýine tosqaýyl qoıdy.
Odan bólek Qashtaq jáne Jernovka aýyldarynyń janyndaǵy oshaqtarǵa da negizgi kúshterdiń basym bóligi jumyldyrylǵan.
«Ystyq núktelerdiń barlyǵyna qajetti quraldarmen jabdyqtalǵan áskerıler, Tótenshe jaǵdaılar mınıstrliginiń qyzmetkerleri jiberildi. Endi qatty jel kóterilip ketpese órtti 1-2 kúnde tolyq sóndiremiz dep jaǵymdy boljam jasap otyrmyz», dedi Nurbolat Derbisov.Áıtse de bul órt sóndirý jumystary 1-2 kúnde tolyq aıaqtalatynyn bildirmeıdi. Sebebi orman ishindegi topyraqtyń betki qabatynda shamamen 20 santımetr tereńdikte sónbegen shoqtar bolýy múmkin, olar tolyq sóndirilgenshe tıisti jumystar toqtamaıtyn kórinedi.