«Astana Hub» halyqaralyq tehnoparki Mońǵolııanyń Ulttyq aqparattyq tehnologııalar parkimen baılanys ornaýǵa beıildi. Alǵashqy qadam da jasaldy. Ulanbatyrda ótken «ICT Expo Mindgolia 2023» aqparattyq tehnologııalar men baılanys salasyndaǵy iri is-sharada «Astana Hub» bas dırektory Maǵjan Mádıev pen Mońǵolııa ulttyq tehnoparkiniń dırektory Jargalsaıhany Zolzaıa ózara yntymaqtastyq týraly memorandýmǵa qol qoıdy.
Kelisim startap ekojúıesin damytý, ınnovasııalyq baǵdarlamalardy qurý jáne qamtamasyz etý, ınvestısııa tartý jáne biliktilikti arttyrýdy kózdeıdi.
– Biz ózara yntymaqtasyp, eki eldiń ekojúıesin damytý baǵytynda birlese jumys isteımiz. Mońǵolııadan «Fibo.cloud», «Metaver», «Cody» sııaqty birneshe áleýetti startap «Astana Hub», «Google for Startups» jáne «Draper University»-niń «Silkway Accelerator» jáne «Hero Training» birlesken baǵdarlamalarynyń qatysýshylary ekenin atap ótkim keledi. Seriktestigimizdiń nátıjesinde eki el arasyndaǵy tehnologııalyq kásipkerlik ıntegrasııasy odan ári nyǵaıa túsetini anyq, – dedi «Astana Hub» bas dırektory Maǵjan Mádıev.
Eske sala keteıik, mońǵolııalyq «Fibo.cloud» startapy – «Astana Hub» jáne «Draper University» birlesken akselerasııa baǵdarlamasynyń nátıjeleri boıynsha tańdalǵan 20 startaptyń biri. Ári qazir AQSh-taǵy Kremnıı alqabynda oqýdan ótip jatyr. О́tken jyly «Fibo.cloud» «Silkway Accelerator» («Astana Hub» pen «Google for Startups»-tyń birlesken baǵdarlamasy) barysynda Mońǵolııa úkimetimen qoǵamdyq «bulttyq» qyzmetterge kelisimshart jasasý jáne Qazaqstandaǵy telekommýnıkasııalyq kompanııamen kelisimge qol qoıý arqyly aı saıynǵy kirisin 22 ese arttyrdy.
Mońǵolııadan kelgen taǵy bir qatysýshy «Metaver» mıkrooqytý platformasy da «Silkway Accelerator» kezinde jaqsy kórsetkishke qol jetkizip, Úndistan naryǵyna shyqty. «Cody» ámbebap kóp arnaly saýda platformasynyń komandasy qazir «Silkway Accelerator»-dyń úshinshi legine qatysyp jatyr. Oqý bir aıdan keıin aıaqtalady.
Osy jyldyń 9-11 maýsymynda Mońǵolııa astanasy Ulanbatyrda ótken «ICT Expo Mindgolia 2023» kórmesine IT-salanyń 100-den astam jetekshi uıymdary, sondaı-aq iri halyqaralyq tehnologııalyq kompanııalar qatysty. Uıymdastyrýshylardyń aıtýynsha, bıylǵy shara ekologııalyq turǵydan erekshe boldy. «Biz úlestirmeli materıaldar men baspa jarnamalaryn paıdalanbaı-aq, sıfrlyq taqtalar, shaǵyn qoldanbalar jáne QR-kod arqyly qaǵazsyz kórme ótkizdik», deıdi olar. Úsh kúnge sozylǵan shara barysynda resmı kezdesýler men kelisimderge qol qoıýmen qatar, lazerlik shoý, gologrammalary bar sahna jáne jaryq shoýy, kıbersport, skýter jarystary, kospleı shoýy, vakansııalar jármeńkesi, startap prezentasııasy ótti.