Qazaqstanda sadaq atýǵa qyzyǵatyn mergen jastardyń qatary kóbeıgen. Búginde dástúrli sadaq atý sportymen aınalysyp júrgenderdiń qatary eki myńnan asady. Ulttyq qundylyqty jańǵyrtý jolynda óńirlerde arnaıy ortalyqtar da ashylyp jatyr. Mundaı ortalyqtardyń sany 15-ke jetti.
Jastar arasynda sánge aınalǵan ulttyq sport túri týraly «Egemen Qazaqstan» gazetiniń tilshisi Zeıin Erǵalı «Jańa trend: sánge aınalǵan sadaq atý» maqalasynda jazǵan.
Byltyr «Dástúrli sadaq atý» óneri Mádenıet jáne sport mınıstrliginiń buıryǵymen sport túri retinde resmı tanyldy. Sodan beri elimizde respýblıkalyq jáne qalalyq deńgeıdegi jarystar jıi uıymdastyrylyp keledi. Jeńiske jetken sportshylar sport sheberi, sport sheberine úmitker jáne halyqaralyq jarystan oryn alǵan jaǵdaıda halyqaralyq dárejedegi sport sheberi atanady. Aıta ketsek, jýyrda ǵana Astana qalasynyń chempıonaty ótti. Oǵan 80-ge jýyq surmergen qatysty. Jarysta 18-24 jáne 24 jastan joǵary azamattar baq synasty.
Osy tusta maqala avtory «Dástúrli sadaq atý» akademııasynyń negizin qalaýshy Dıas Ahmetovpen júzdesip, chempıonat jaıly pikir almasty.
«Chempıonat tórt túrli nysana boıynsha ótti. Olar bylaı jikteledi: túriktiń pýta nysanasy 70 metr (erler arasynda), 60 metr (áıelder arasynda) (9 oqtan 7 múmkindik), Orta Azııa nysanasy 35/40 metr (5 oqtan 6 múmkindik), qalqan nysanasy 60 metr erler, 50 metr áıelder (7 oqtan 7 múmkindik) jáne Jamby nysanasy 30 metr (erler men áıelder) (5 oqtan 3 múmkindik). Barlyq sportshylarǵa birdeı tórt nysanada baq synaý múmkindigi berildi. Ár nysana boıynsha anyqtalǵan jeńimpazdar baǵaly syılyqtarmen birge 23-27 maýsym aralyǵynda Almaty oblysynyń Qarasaı aýdanynda ótetin Qazaqstan Respýblıkasynyń chempıonatyna qatysý múmkindigine ıe boldy. Bul saıystyń ereksheligi – qazaqtyń dástúrin saqtaıtyn ulttyq naqyshtaǵy kıimimiz. Saıysta tek sport damymaıdy, onymen qosa qazaqtyń rýhy jańǵyryp, ulttyq sportqa degen súıispenshilik artady. Sońǵy úsh jyldyń ishinde dástúrli sadaq atýǵa degen qyzyǵýshylyq artty. 32 jyldyń ishinde qazaqtar endi ǵana qazaq ekenin sezinip jatyr»,
Sonymen qatar 7 jastan 70-ke deıingi aqsaqaldar da bul sport túrine qyzyǵýshylyq tanytyp júr. Jarysta respýblıkalyq «Dástúrli sadaq atý» federasııasynyń sport menedjeri ári mergen Baqbergen Sálimov asa qyraǵylyǵymen jebesin nysanaǵa dóp tıgizip, birinshi oryndy qanjyǵasyna baılady.
Bes qarýdyń biri sanalatyn sadaq atý ónerin damytý alǵash 2019 jyly shilde aıynda «Sadaq atý» respýblıkalyq dástúrli sadaq atý federasııasy» qoǵamdyq birlestiginiń ashylýymen bastaý alǵan. Maqala avtorynyń jazýynsha, alǵashqyda mergender sapynda 50-ge jýyq sportshy bolǵan. Tipti Almaty men Astana qalasynda sadaq atýdy eki mektep qana úıretken. Endi mine, araǵa tórt jyl salyp, qajyrly eńbek pen tókken terdiń arqasynda ár óńirde federasııa men sadaq atý mektepteri ashylǵan. Kásibı sportshylardyń sany da myńnan asqanyn aıta ketý kerek.
Eske sala ketsek, dástúrli sadaq atýdan IV Dúnıejúzilik kóshpeliler oıyndarynda elimiz 1 kúmis medalǵa ıe bolǵan. Sondaı-aq byltyr mamyr aıynda Túrkııa eliniń Ystanbul qalasynda jyl saıyn ótkiziletin «Fetih Kupası» halyqaralyq týrnırine Qazaqstanǵa 14 kvota buırypty. Bul týrnırge sadaqshylardan erler jáne áıelder sanattary boıynsha qatysqan.
«2022 jylǵy 29 qyrkúıek pen 2 qazan aralyǵynda Túrkııanyń Iznık qalasynda ótken IV Dúnıejúzilik kóshpeliler oıyndaryna 13 sadaqshymyz baqtaryn synap kórdi. «Túrik nysanasy» boıynsha sadaqshy Qasymhan Qanat 105 sportshynyń arasynan sheshýshi synǵa shyǵyp, 2-orynǵa ıe boldy. Bıyl elimizdiń ulttyq quramasyna dástúrli sadaq atýdan 36 sportshy engizildi», dedi «Dástúrli sadaq atý» akademııasynyń aǵa bapkeri Dıas Ahmetov.
Aıta ketsek, keler jyly Qazaqstanda V Dúnıejúzilik kóshpeliler oıyndary ótkiziledi. Dástúrli sadaq atýdan Qazaqstannyń ulttyq qurama komandasynyń músheleri osy dúbirli dodaǵa qatysyp, baq synasýǵa saqadaı saı otyr.