Oblystyń qoǵamdyq damý basqarmasy jáne «Turaqty damý» qoǵamdyq jastar birlestiginiń uıymdastyrýymen «Ulytau go» jobasy aıasynda oblys jastary úshin úsh kún boıy Ulytaý baýraıynda jazǵy lager uıymdastyryldy.
Oblys jastarynyń zamanaýı quzyrettilikteri men qabiletterin arttyrý, olardyń tulǵalyq qalyptasýyn shyńdaý, elimizdegi jastar saıasatyn jetildirý máseleleri men múmkindikterin talqylaý, respýblıkalyq, óńirlik baǵdarlamalardy iske asyrýǵa jastardyń qatysý deńgeıin ósirý, bir sózben aıtqanda, jastardyń dúnıetanymyn keńeıtýmen qatar salamatty ómir saltyn nasıhattaýdy maqsat etken lager jumysyna Aqparat jáne qoǵamdyq damý mınıstrliginiń, oblystyq ákimdik ókilderi, respýblıkalyq, oblystyq deńgeıdegi trenerler, qoǵamdyq pikir kóshbasshylary, ártúrli deńgeıdegi depýtattar, bıznes, BAQ ókilderi qatysty.
Lagerdiń saltanatty ashylýynan soń jastar «Jastar jáne kásipkerlik», «Bızneske alǵashqy qadam», «Jastarǵa arnalǵan bıznes-ıdeıalar» degen taqyryptar boıynsha pikir almasty.
Ulytaýǵa kelip turyp, Áýlıetaýǵa kóterilmeýge bola ma? Jastar taý bıigine shyǵyp, ásem tabıǵatty bıikten tamashalap, keshkilik alaý janynda bas qosty. Ádemi ánder shyrqaldy, kóńildi «Jaıdarman» oıyny oınaldy.
Lagerdiń sońǵy kúninde Joshyhan kesheni men Dombaýyl kesenesine ekskýrsııa jasaldy. Sondaı-aq qatysýshylardyń barlyǵyna sertıfıkattar tapsyryldy.
Ulytaý oblysy