Májilistiń Áleýmettik-mádenı damý komıtetiniń otyrysy ótip, onda «Mass-medıa týraly» zań jobasy qaraldy. Zań jobasynyń prızmasy arqyly medıa salasynyń damý tendensııalary taqyrybynda ótken jıynǵa komıtet tóraǵasy Ashat Aımaǵambetov jetekshilik etti.
Is-sharaǵa Aqparat jáne qoǵamdyq damý mınıstrliginiń ókilderi, jýrnalıstıka salasynyń ardagerleri, gazet, telearna men aqparattyq agenttikterdiń basshylary, qoǵamdyq birlestikterdiń ókilderi qatysty.
Ashat Aımaǵambetov basqosýdyń «Mass-medıa týraly» zań jobasynyń jańa tujyrymdamalyq negizderin tanystyrýǵa arnalǵanyn aıtty. Depýtattar aldynda baıandama jasaǵan Aqparat jáne qoǵamdyq damý vıse-mınıstri Qanat Ysqaqov zań jobasyn ázirleý kezinde mınıstrlik Eýropa elderiniń ozyq tájirıbesi, BUU men EQYU strategııalyq qujattary jan-jaqty zerttelgenin aıtty.
«Zań jobasy sóz bostandyǵy quqyǵyn nyǵaıtýǵa jáne qamtamasyz etýge baǵyttalǵan jańa qaǵıdattar men memlekettik kepildikterge negizdelgen. Joba jańalyqtary birneshe taqyryptyq blok boıynsha qalyptastyrylǵan. Birinshiden, jýrnalıst mártebesin kóterý. Ekinshiden, memlekettik aqparattyq saıasatty qarjylandyrý tetikterin reformalaý. Úshinshiden, teleradıo habarlaryn taratýdy damytý», dedi Q.Ysqaqov.
Sondaı-aq vıse-mınıstr jýrnalısterge arnalǵan baspasóz kartasyn engizýdi usyndy. Onyń aıtýynsha, baspasóz kartasy jýrnalısterdi akkredıtteý úderisin jeńildetýge yqpal etip, aqparat alýyna jáne taratýyna eshqandaı kedergi keltirmeıdi. Kerisinshe, karta BAQ ókilderiniń jumysyn yntalandyryp, ońtaılandyrýǵa baǵyttalǵan.
Otyrysta zań jobasy boıynsha qoǵam qaıratkeri, jýrnalıst Serik Sarybaev, «Media Net» halyqaralyq jýrnalıstıka ortalyǵy dırektorynyń orynbasary Dýman Smaqov, «Ádil sóz» Qoǵamdyq qorynyń ókili Qarlyǵash Jamanqulova, «Syrym eli» saıası gazetiniń redaktory Baýyrjan Shımerdenuly sóz sóılep, óz usynystaryn aıtty.
Jıyn barysynda Májilis depýtaty Ermurat Bapı, Amanjol Áltaev, Juldyz Súleımenova, Anas Baqqojaev, Tańsáýle Serikov, Jarqynbek Amantaıuly zań jobasyn ázirleýshilerge suraq qoıyp, pikirlerin ortaǵa saldy. О́z kezeginde depýtat Elnur Beısenbaev BAQ ókilderine mártebe berip, baspana máselesin sheshý múmkindikterin qarastyrýdy usyndy.
«Qazirgi kúnnen bastap Otbasy bank, sonymen qatar ekinshi deńgeıli banktermen tikeleı kelisissózder júrgizý qajet. Qalaı jáne qandaı baǵytta engizemiz? Úıdi qansha paıyzben alý múmkindigine ıe bolady? О́ıtkeni jýrnalısterdi kategorııa retinde tek 2019 jyly qabyldanǵan «Almaty jastary» sııaqty baǵdarlamada pysyqtaǵan bolatynbyz. Qazir barlyq áleýmettik jelide qatysyp otyrǵan jýrnalıster «bir kúnde bizdi kategorııaǵa engizedi» dep oılamaýy qajet. О́ıtkeni árbir mamandyqty kategorııaǵa qosý múmkin emes», dedi E.Beısenbaev.
Sondaı-aq jıynda zań jobasyn ázirleýshiler memlekettik BAQ-ta eńbek etetin qyzmetkerlerdiń jalaqysy 2023 jyly – 30, 2024 jyly – 30, 2025 jyly 20 paıyzǵa artatynyn aıtty. Jalpy alǵanda, qoldanystaǵy «Buqaralyq aqparat quraldary týraly» zań 1999 jyly qabyldanǵan, oǵan 40-tan astam ózgertý men tolyqtyrý engizilgen. Osy zań jobasy arqyly BAQ zańnamasy 35 paıyzǵa jańartylady.
Otyrysty qorytyndylaǵan Ashat Aımaǵambetov Májilis bul zań jobalaryn endi jumysqa alǵanyn aıtyp, aldaǵy ýaqytta talqylaýǵa quzyrly organ ókilderiniń barlyǵyn belsendi qatysýǵa shaqyrdy.