Parlament palatalarynyń birlesken otyrysynda depýtattar 2022 jylǵy bıýdjettiń atqarylýy týraly Úkimet pen Joǵary aýdıtorlyq palatanyń esepterin bekitip, «Prokýratýra týraly» Qazaqstan Respýblıkasynyń Konstıtýsııalyq zańyna ózgerister men tolyqtyrýlar engizý týraly» Konstıtýsııalyq zańdy qabyldady, dep habarlaıdy Egemen.kz Májilistiń baspasóz qyzmetine silteme jasap.
Parlament palatarynyń birlesken otyrysynyń kún tártibindegi birinshi másele – QR Konstıtýsııalyq Sotynyń «Qazaqstan Respýblıkasyndaǵy konstıtýsııalyq zańdylyqtyń jaı-kúıi týraly» joldaýy jaıly boldy. Konstıtýsııalyq Sot tóraǵasy Elvıra Ázimova Memleket basshysynyń konstıtýsııalyq reformasynyń nátıjesinde Konstıtýsııalyq Sot qurylyp, azamattarǵa osy organǵa qorǵaý úshin júginý quqyǵy berilgenin atap ótti.
– Bes aı ishinde úsh myńnan astam azamat óz quqyqtaryn konstıtýsııalyq qorǵaýǵa júgindi. Bul sıfrlar azamattardyń jańa organǵa degen jaı ǵana qyzyǵýshylyǵynyń dáleli emes, ótinish berýshilerdiń árqaısysynyń óz quqyqtaryn qorǵaý nıetin rastaıdy. Bul rette Qazaqstan zańnamasynda Konstıtýsııalyq Sotqa júgingenge deıin quqyqtyq qorǵaýdyń basqa quraldaryn qoldaný týraly talap joq, – dedi E.Ázimova.
Konstıtýsııalyq Sottyń tóraǵasy azamattyń konstıtýsııalyq júginý ınstıtýty qoǵamnyń, memlekettik apparattyń jáne azamattyń konstıtýsııalyq quqyqtyq sana men quqyqtyq mádenıet deńgeıin arttyrýdy talap etetinine mán berdi. Qaraý qorytyndysy boıynsha Parlament Konstıtýsııalyq Sottyń joldaýyn nazarǵa alý týraly sheshim qabyldady. Kún tártibindegi ekinshi másele – Úkimet pen Joǵary aýdıtorlyq palatanyń 2022 jylǵy respýblıkalyq bıýdjettiń atqarylýy týraly esepterin bekitý. Bul jóninde Premer-mınıstrdiń orynbasary – Qarjy mınıstri Erulan Jamaýbaev pen Joǵary aýdıtorlyq palata tóraıymy Natalıa Godýnova baıandama jasady. Májilis depýtaty Ulasbek Sádibekov respýblıkalyq bıýdjettiń atqarylýynyń negizgi tustary men ózekti problemalaryna toqtalyp, Úkimet esepti talqylaý kezinde aıtylǵan eskertýler men usynystardy aldaǵy ýaqytta eskerýi qajet ekendigin aıtty.
– Memleket basshysy bıýdjetti josparlaý jáne memleket qarajatyn jumsaý kezinde qabyldanatyn barlyq sheshim meılinshe tıimdi bolýǵa tıis ekenin birneshe ret atap ótken bolatyn. Bıýdjetti josparlaý men atqarýda sozylmaly sıpatqa ıe bolyp otyrǵan kemshilikter týraly máseleni depýtattyq korpýs ta únemi kóterip otyrady, – dedi depýtat.
Jaryssóz nátıjesinde Májilis pen Senat depýtattary Úkimet pen Joǵary aýdıtorlyq palatanyń esepterin bekitý týraly sheshim qabyldady.