Qazaqstandaǵy eriktiler sany 200 myńǵa jetti. Bul týraly Memleket basshysy Qasym-Jomart Toqaev aıtty, dep habarlaıdy Egemen.kz.
«Sońǵy jyldary elimizde aýqymdy reformalar júrgizildi. Jańa jobalar júzege asyrylyp jatyr. Bul jumys tabysty bolýy úshin búkil qoǵam atsalysýy kerek. Memleket pen qoǵam arasyndaǵy senimdi seriktestik óte mańyzdy. Osy oraıda volonterlerdiń róli erekshe. Búginde olar qoǵamnyń túrli salalarynda belsendi qyzmet etip jatyr. Qazaqstanda 2020 jyl Eriktiler jyly bolyp jarııalandy. Qazir elimizde volonterlik uıymdardyń sany úsh esege, ıaǵnı 680 uıymǵa ósti. Eriktiler sany 200 myńǵa jetti. Barlyq aımaqtarda front-ofıster ashyldy, onda myńdaǵan eriktiler oqytyldy. Qazvolunteer.kz platformasy quryldy», dedi Prezıdent.
Sondaı-aq Prezıdent búginde Qazaqstanda kez kelgen adam eriktiler tobyna múshe bolyp, paıdaly isterge atsalysa alatynyn atap ótti.
«Bul shyn máninde úlken múmkindik. Sondaı-aq eriktilerimiz Iordanııa, Kenııa, Taıland, Túrkııa elderine arnaıy baryp, tájirıbe jınaqtady. Osy sátte men Qazaqstan volonterlerine qoldaý kórsetip jatqan BUU ókilderine alǵys aıtamyn. О́tken jyly elimizde Ortalyq Azııa volonterleriniń birinshi forýmy ótti. Mańyzdy sharalar aldaǵy ýaqytta da jalǵasyn tabady. О́ıtkeni eriktiler qatarynda qoǵamǵa adal qyzmet etý bir kúndik nemese ýaqytsha jumys emes, bul árbir erikti óz erkimen tańdaıtyn ómirlik maqsaty. Jalpy, volonterlik qyzmet – patrıotızmniń jarqyn úlgisi. Bul adamgershilik qundylyqtardy bárinen joǵary qoıatyn adamdardyń ómir salty. Eriktiler qoǵamnyń damýyna úlken úles qosyp jatyr», dep qosty Qasym-Jomart Toqaev.
Buǵan deıin elordada eriktilerdiń halyqaralyq forýmy bastalǵany habarlanǵan edi. Oǵan 34 elden 140-tan astam eriktiler qatysyp jatyr. 50 sheteldik spıker keldi. Qazaqstannyń túkpir-túkpirinen eriktiler de jınaldy. Barlyǵy 400-den astam qatysýshy boldy.