Senat Spıkeri Máýlen Áshimbaevtyń tóraǵalyǵymen Qazaqstan Respýblıkasynyń Ornyqty damý salasyndaǵy ulttyq maqsattary men mindetteriniń iske asyrylýyna monıtorıng júrgizý jónindegi parlamenttik komıssııanyń alǵashqy otyrysy ótti, dep habarlaıdy Egemen.kz Parlamet Senatynyń baspasóz qyzmetine silteme jasap.
Palata Tóraǵasy Memleket basshysy Qasym-Jomart Toqaevtyń tapsyrmasy boıynsha qurylǵan Komıssııanyń jumysy Qazaqstannyń ornyqty damý maqsattaryna qol jetkizýine jáne olardy iske asyrýdaǵy tıimdilik pen ashyqtyqty qamtamasyz etýge baǵyttalǵanyn atap ótti.
«Prezıdentimiz Qasym-Jomart Kemeluly Toqaev 2019 jyly Birikken Ulttar Uıymynyń Ornyqty damý máseleleri jónindegi forýmynda sóılegen sózinde ornyqty damý maqsattary boıynsha kózdegen nátıjelerge qol jetkizý úshin sheshýshi sharalar qabyldaý qajettigin aıtty. Sońǵy jyldary elimizde bul baǵytta keıbir oń ózgerister baıqalady. Degenmen, Ornyqty damý maqsattarynyń álemdik progress reıtınginde Qazaqstannyń pozısııasy tómendep otyr. Jaqynda Birikken Ulttar Uıymy Jańa baıandama jarııalady. Soǵan sáıkes biz shamamen 2020 jylǵy deńgeıge deıin tómendedik. Bul elimizde ornyqty damý salasy boıynsha erekshe nazar aýdarýdy qajet etetin salalar bar ekenin kórsetedi», dedi Máýlen Áshimbaev.
Otyrys barysynda Senat Tóraǵasy Komıssııanyń mindetterine bıýdjettik parametrlerdi qaraý jáne baqylaý da jatatynyna nazar aýdardy. Ol aldaǵy kúzde Parlamentte jańa Bıýdjet kodeksi qaralatynyn, sol kezde atalǵan maqsattardy iske asyrý jónindegi negizgi qaǵıdattar belgilenýi kerek ekenin tilge tıek etti.
«Ornyqty damýdyń ulttyq maqsattaryna nátıjeli qol jetkizý úshin Parlament pen Úkimettiń birlesip, tıimdi jumys júrgizýi mańyzdy. Eń aldymen, Ornyqty damý maqsattarynyń 2030 jylǵa deıingi ulttyq ındıkatorlaryn naqtylaý qajet. Qazir olardyń keıbiri áli aıqyndalmaı otyr. Bul negizgi maqsatqa qol jetkizýge jáne tıimdi monıtorıng júrgizýge keri áserin tıgizedi. Sonymen qatar Parlamenttik komıssııa músheleri aldaǵy jyldary ornyqty damý saıasatyn tıimdi iske asyrý úshin qajetti zańnamalyq bastamalardy da kóterip, ázirleýge múmkindik bar», dedi Máýlen Áshimbaev.
Alǵashqy otyrys kezinde Parlamenttik komıssııa týraly ereje jáne aldaǵy kezeńge arnalǵan jumys jospary bekitildi. Odan bólek, Ulttyq ekonomıka mınıstri Álibek Qýantyrov Qazaqstannyń ornyqty damý salasyndaǵy maqsattary men mindetteriniń oryndalýy týraly baıandama jasady. Kún tártibinde qaralǵan ornyqty damý maqsattaryn iske asyrý sheńberinde qorshaǵan ortany qorǵaý jáne ekologııalyq mádenıet qalyptastyrý jónindegi keshendi sharalar týraly másele boıynsha Ekologııa jáne tabıǵı resýrstar mınıstri Zúlfııa Súleımenova aıtyp berdi.
Aıta keteıik, Parlamenttik komıssııanyń quramy 20 maýsymda ótken Parlament Palatalarynyń birlesken otyrysynda bekitilip, oǵan Senat Spıkeri Máýlen Áshimbaev tóraǵa bolyp saılandy. Komıssııanyń quramyna Senat pen Májilisten 9 depýtat endi. Komıssııa Tóraǵasynyń orynbasarlary retinde Senat vıse-spıkeri Olga Perepechına men Májilis vıse-spıkeri Albert Raý saılandy. Al, senator Aqmaral Álnazarova Komıssııanyń hatshysy bolyp saılandy. Sondaı-aq atalǵan qurylymnyń jumysyna memlekettik organdardyń, azamattyq sektordyń, ǵylymı qoǵamdastyqtyń jáne halyqaralyq damý ınstıtýttarynyń ókilderi de qatysady.