Jıyn barysynda Memleket basshysy Reseı Federasııasyndaǵy jaǵdaıǵa baılanysty bergen tapsyrmalaryn oryndaý sharalary týraly Premer-mınıstrdiń, Bas prokýrordyń, Ulttyq qaýipsizdik komıteti tóraǵasynyń, Qorǵanys, Ishki ister jáne Syrtqy ister mınıstrleriniń baıandamalaryn tyńdady, dep habarlaıdy Egemen.kz Aqordanyń baspasóz qyzmetine silteme jasap.
Bul oqıǵa Reseıdiń ishki máselesi ekenine qaramastan, atalǵan jaǵdaıǵa elimizdiń azamattary alańdaýshylyq tanytty. Qazaqstan men Reseı arasyn álemdegi eń uzyn shekara bólip jatyr. Prezıdent Reseı Qazaqstannyń strategııalyq seriktesi ekenin atap ótti.
Qasym-Jomart Toqaev Vladımır Pýtınmen telefon arqyly sóılesý barysynda Reseı bıliginiń konstıtýsııalyq tártipti ornatý jáne óz azamattarynyń qaýipsizdigin qamtamasyz etý jónindegi sharalaryn qoldaǵanyn eske saldy. Memleket basshysy áskerı is-qımyldardy toqtatý jónindegi kelisimdi quptady. Prezıdent kez kelgen memlekettiń ishki saıasatynda, sonyń ishinde Qazaqstanda da, qoǵamdyq tártip pen eldiń áleýmettik-ekonomıkalyq damýyn qamtamasyz etýdiń negizi retinde zań ústemdigi qaǵıdaty basty basymdyq bolýǵa tıis ekenin aıtty.
Jıynda elimizdiń qarjy-ekonomıkalyq turaqtylyǵyn jáne azamattardyń qaýipsizdigin qamtamasyz etý qajet ekeni atap ótildi. Prezıdent barlyq vedomstvo basshylaryna daǵdarys jaǵdaıyndaǵy yqtımal qaterlerge qarsy áreket etýge daıyn bolýdy tapsyrdy.
Qaýipsizdik keńesi otyrysynyń qorytyndysy boıynsha Memleket basshysy Úkimet ázirlegen shuǵyl is-qımyl josparyn maquldady.