Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanulynyń bıylǵy jyldy «Islam jáne izgi qoǵam» jyly dep jarııalaǵany belgili.
Osy ataýly jylǵa oraı oblystyq ortalyq meshit ımamdarynyń uıytqy bolýymen jáne jomart jandardyń demeýshiligimen Qonaev qalasynda qazaq kúresinen tuńǵysh ret «Imamdar barysy» týrnıri ótti. Onyń basty maqsaty – din qyzmetkerleri arasynda salamatty ómir saltyn nasıhattap, ulttyq sporttyń damýyna atsalysý.
Imamdar arasynda alǵash ret uıymdastyrylǵan sporttyq is-sharanyń ashylý saltanatyna oblystyq sport jáne dene shynyqtyrý basqarmasynyń basshysy Nurbaqyt Teńizbaev, din isteri basqarmasynyń bólim basshysy Erlan Mataev, Qonaev qalalyq ardagerler keńesiniń tóraǵasy Amankeldi Bespaev pen aqsaqaldar keńesiniń tóraǵasy Beısetaı Qashaqbaev qatysyp, kórermendermen birge beldeýlerdi tamashalady.
Ádette meshitte ǵana kórinetin aq sáldeli ımamdardyń bozkilemde birin-biri julqa tartyp, shalt qımylmen jambasqa salýǵa tyrysqan beldesýlerin qyzyq kórip, tamashalaýǵa kelgen jankúıerlerdiń delebesin qozdyrǵan jarys jerebe tartý rásiminen bastaý aldy. Irikteý kezeńinde jarysqa qatysýshy ımamdar 80 kıloǵa deıingi, odan joǵary salmaq dárejesi boıynsha eki topta synǵa tústi. Aıla men ádis, eptilik pen kúshtilik synalǵan tusta Talǵar, Ile, Jambyl, Qarasaı, Eńbekshiqazaq, Uıǵyr aýdandarynyń meshit qyzmetkerleri kásibı sportshylardan kem emes óner kórsetkenin aıryqsha atamaqpyz. Qarsylasynyń jaýrynyn jerge tıgizgen myqty ımamdardy qazylar alqasy anyqtap, týrnırge tórelik etti.
Tartysqa toly týrnır qorytyndysynda 80 kıloǵa deıingi salmaq dárejesi boıynsha Eńbekshiqazaq aýdany Avat aýyldyq meshitiniń bas ımamy Damır Ońǵarbek 1-oryndy jeńip alsa, 2 jáne 3-oryndardy Talǵar aýdanynyń Jańalyq aýyldyq meshitiniń ımamy Rýslan Isabaev pen Nura aýyldyq meshitiniń naıb ımamy Almat Qabylhan ıelendi.
Al 80 kılodan joǵary salmaqtaǵy beldesýlerde bas júldeni Qarasaı aýdanyna qarasty Jańashamalǵan aýyldyq «Birlik» meshitiniń naıb ımamy Asanhoja Sabyrov ıelense, Qaskeleń qalasyndaǵy «Irshat» meshitiniń bas ımamy Abdýlmajıt Abdýlqadyruly 2-orynǵa, al Jambyl aýdany Uzynaǵash aýyldyq meshitiniń ımamy Beısenbi Avraı 3-orynǵa taban tiredi. Jarys jeńimpazdaryna – Ýmraǵa joldama, 2-orynǵa – 200 myń teńge, 3-orynǵa 100 myń teńge aqshalaı syılyq tabys etildi.
«Sharıǵatymyz adamnyń rýhanı qýattylyǵymen qatar, onyń dene bitiminiń de qýatty bolýyn talap etedi. Muhammed paıǵambarymyzdyń hadısinde «Álsiz musylmannan qýatty musylman Allaǵa súıkimdirek» delingen. Sondyqtan «shynyqsań shymyr bolasyń» dep dana halqymyz aıtqandaı, bul ımamdar meshitte otyryp, dinı rásimderdi ǵana oryndap qoımaı, sonymen qatar ulttyq sportqa da beıim ekenin nasıhattaý barysynda uıymdastyrylǵan is-shara boldy. Básekeli jarysta ımamdar arasynda qazaq kúresine ıkemdi, sheber beldese biletin ımamdar bar ekenin bildik. Sport salasynyń mamandary bul jarysqa joǵary baǵa berdi. Mundaı is-sharalar aldaǵy ýaqytta da jalǵasyn tabady», deıdi oblystyń bas ımamy Madııar Pirimqulov.
Almaty oblysy