Otandyq bıotehnolog Serikhan Aıdarhanuly organıkalyq qaldyqtardy óńdeıtin ádis oılap tapty. Bul joba úsh jyl buryn iske qosyldy. Ádistiń basty komponenti – «Qara sarbaz» shybyny. Shybynnyń bul túri elimizde kezdespeıdi. Sondyqtan bıotehnolog olardy Reseıden aldyrtyp, elimizde ósiredi. Bul týraly Ulttyq memlekettik ǵylymı-tehnıkalyq saraptama ortalyǵy habarlady.
Máselen, shybynnyń dernásili kez kelgen qaldyqtyń 99 paıyzyn óńdeıdi. Dernásil – jándiktiń shybynǵa aınalǵanǵa deıingi túri. Shamamen úsh-tórt myń qurt 300-400 kılo qaldyqty óńdeı alady. 45 kúnniń ishinde jándik jumyrtqadan shybynǵa aınalady. Osy ýaqyttyń alǵashqy eki aptasynda dernásil taǵam qaldyǵy salynǵan «basseınge» salynady. Olar sol «qoqyspen» qorektenip, ósip shyǵady. Qazir Qazaq ulttyq ýnıversıtetinen shyǵatyn taǵam qaldyǵynyń bári osy tehnologııa arqyly óńdeledi.
Odan keıin ol qara tústi qurtqa aınalyp, shybyn bolýǵa daıyndalady. Al úsh apta ótken soń shybynǵa aınalady. Eki aptada shybyn jumyrtqalaıdy da, tirshiligin toqtatady. Osy júıe arqyly sıkl jalǵasady. «Shybyn dernásili óńdep shyqqan qaldyqtyń ári qaraı paıdalanýǵa ábden bolady. Mysaly, óńdelgen qaldyqtan tabıǵı taza tyńaıtqysh óndiriledi. Muny «zoogýmýs» dep ataıdy. Bul zııankestermen kúresýge óte tıimdi», deıdi Serikhan Aıdarhanuly.
Oǵan qosa ǵalym qurttyń bir bóligin arnaıy apparatqa salyp keptirip, dárýmenge toly ónim jasaıdy. Bul ónimdi kóbine qus, balyq sharýashylyǵymen aınalysatyndar jem retinde satyp alady. Shybynnyń dernásilin untaqtap aralastyryp, iri qara malǵa azyq retinde de beredi. Bul qorek maldyń dertke shaldyǵýyn azaıtyp, sútin arttyrady. Ǵalym shybynnyń dernásilimen qorektengen maldyń eti qunarly bolatynyn aıtyp otyr. О́ıtkeni qurttardyń denesinde barlyq amınqyshqyl, sonyń ishinde lızın jáne metıonın sııaqty bıologııalyq qundy zattar bar.