Elimizde sheteldik avtokólikterdi zańdastyrýdyń aıaqtalýyna sanaýly kúnder qaldy. Búginde ol qalaı júrip jatyr? Bul týraly Ishki ister mınıstrligi ótkizgen brıfıngte Ákimshilik polısııa komıtetiniń erekshe tapsyrmalar jónindegi aǵa ınspektory, polısııa maıory Altynbek Jamalıev aıtyp berdi.
Onyń aıtýynsha, kólikterdi zańdastyrý aıaqtalady degen kezde ǵana el turǵyndary mamandandyrylǵan halyqqa qyzmet kórsetý ortalyqtaryna jappaı lap qoıyp, kólikterin tirketip jatqan jaıy bar. Ásirese mundaı jaǵdaılar Almaty, Astana jáne Shymkent sekildi úlken qalalarda qatty baıqalyp jatyr.
– Biz sheteldik kólikterdi tirkemeı júrgen azamattardyń eń sońǵy kúnderi qımyldaıtynyn aldyn ala bildik. Sony eskere otyryp halyqqa qyzmet kórsetý ortalyqtarynyń jumys ýaqytyn uzarttyq. Olar jumys kúnderi keshki 7 jarymǵa deıin qujat qabyldasa, daıyn qujattardy 8 jarymǵa deıin beredi. Soǵan qaramastan halyqtyń kóptiginen jumys óte qaýyrt. Sebebi krımınalıstıka qyzmetkerleriniń kólikterdi tekserýi biraz ýaqyt alady, – dedi IIM ókili.
Onyń aıtýynsha, kólikterdi tirkeýge qujat qabyldaý 1 shildege deıin jalǵasady. Soǵan deıin úlgergen adamdardyń ótinishteri odan ári de qarala beredi. Iаǵnı 1 shildege deıin qujattardy qabyldaý ǵana júrgizilse, odan keıin tirkeý bastalady.
– Osy kúngeı deıin 177 myńnan astam avtokólik tirkeldi. Sonyń ishinde sońǵy 10 kúnniń ishinde 10 myńnan astam kólik tirkelip úlgerdi. Bizdiń esebimizshe, áli de tirkeýge ruqsat alǵan 13 myńnan asa kólik bar, – dedi Altynbek Jamalıev.