Prezıdent Qasym-Jomart Toqaev pen Germanııa Prezıdenti Frank-Valter Shtaınmaıerdiń qatysýymen ótken Qazaqstan-Germanııa ýnıversıtetteri rektorlarynyń forýmy aıasynda D.Serikbaev atyndaǵy Shyǵys Qazaqstan tehnıkalyq ýnıversıteti men Qazaqstan-Germanııa ýnıversıteti metallýrgııa jáne taý-ken isi salasynda Ǵylym jáne tehnologııa ınstıtýtyn ashý týraly kelisim jasady.
Kelisim boıynsha metallýrgııa jáne paıdaly qazbalardy óndirý salasynda Ǵylym jáne tehnologııalar ınstıtýty qurylyp, ınjenerııa salasyndaǵy úzdik nemis ǵalymdarynyń tájirıbesi elimizde qolǵa alynady.
Jobanyń maqsaty – Shyǵys Qazaqstan óńirin órkendetý, ál-aýqatyn arttyrý jáne ornyqty damýyn júzege asyrý úshin zertteýler, bilim jáne ınnovasııa «bilim úshtigine» negizdelgen platforma qurý.
«Ǵylym jáne joǵary bilim salasyndaǵy saıasat bilim men ǵylymdy ınternasıonaldandyrýdy keńeıtýge, turaqty jáne tıimdi baılanystardy qalyptastyrýǵa baǵyttalǵan. Yntymaqtastyq negizi úsh túrli baǵytta júrgiziledi. Birinshisi – bilim berý. Bul metallýrgııa, mashına jasaý, geologııa jáne taý-ken isi, paıdaly qazbalardy baıytý, turaqty damý baǵyttary boıynsha eki dıplomdy jáne birlesken kadrlar daıarlaý. Ekinshi baǵyt – metallýrgııa jáne materıaltaný, geodezııa, geologııa jáne taý-ken isi, turaqty damý salasyndaǵy birlesken zertteýler. Úshinshi baǵyt – ınnovasııalar, ǵylym men óndiristiń ınnovasııalyq klasterin, birlesken ǵylymı jobalar, bıznes-ınkýbator qurý jáne startap jobalardy iske qosý. Eksperımenttik óndirister men qanatqaqty jelilerdi qurý», dep túsindirdi D.Serikbaev atyndaǵy ShQTÝ basqarma tóraǵasy, rektor Sáýle Rahmetýllına.
Metallýrgııa jáne paıdaly qazbalardy óndirý salasynda jańa ınstıtýttyń qurylýy el ǵylymy men tehnologııalaryn damytýdaǵy, sondaı-aq eki el arasyndaǵy dostyq qarym-qatynastardy nyǵaıtýdaǵy mańyzdy qadam bolyp otyr.
Shyǵys Qazaqstan oblysy