Astanada Dına Nurpeıisova eskertkishiniń janynda dombyrashylar bas qosyp, jetinshi kúı jármeńkesin ótkizdi, dep habarlaıdy Egemen.kz elorda ákimdiginiń resmı saıtyna silteme jasap.
Jármeńkege tájirıbeli, tanymal dombyrashylar da, kelesheginen zor úmit kúttiretin jas talanttar da qatysty.
«Kúı jármeńkesin jetinshi ret ótkizip otyrmyz. Bizdiń basty maqsatymyz – jastardy ulttyq ónerge baýlý, patrıottyq sezimin arttyrý», dedi «Kúı anasy» respýblıkalyq qorynyń basshysy Tólegen Qýanyshev.
Dombyra úni men ulttyq kúılerdi tyńdaý úshin qala turǵyndary men qonaqtary jınaldy.
«Men úıime asyǵyp ketip bara jatyr edim, kenetten dombyranyń sıqyrly únin estidim. Dana halqymyz «Jaratqan ıemiz ár qazaqtyń jan dúnıesine kúıdiń bir bólshegin engizip qoıǵan» deıdi. Men bul pikirmen tolyq kelisemin. Shynynda da, bizdiń jerimiz talanttarǵa baı. Búgingi is-shara – osynyń bir dáleli», dedi Astana turǵyny Madına Sábıtova.