Májilisi depýtaty, Palata tóraǵasynyń orynbasary Albert Raý Qostanaı oblysyndaǵy Beıimbet Maılın aýdanynyń aýyldaryna baryp, taza aýyz sýmen qamtý jumystarymen tanysty, dep habarlaıdy Egemen.kz.
Asenkrıtovka, Krasnoselskoe, Maıskoe aýyldaryndaǵy sýmen jabdyqtaý nysandary «AMANAT» partııasynyń Saılaýaldy baǵdarlamasyn oryndaýdyń Jol kartasyn iske asyrý aıasynda qolǵa alynǵan.
Myńnan astam turǵyny bar Asenkrıtovka aýylynda aýyz sý qubyrlary jańartylyp, Krasnoselskoe aýylyndaǵy sý qubyrynyń qurylysy jýyq arada aıaqtalýy josparlanyp otyr. Jobanyń jalpy quny 740 mln teńgeni quraıdy.
Aýyl turǵyndary sý tapshylyǵy máselesinen arylyp, sapaly aýyz sýǵa qol jetkizgenderin aıtyp, rızashylyqtaryn bildirdi.
Albert Raý odan ári Qostanaı – Qarabutaq baǵytyndaǵy respýblıkalyq mańyzy bar joldyń jóndeý jumystarymen tanysty.
Depýtattyń aıtýynsha, qazirgi tańda aýyldyń áleýetin kóterý maqsatynda «Aýyl - el besigi» jobasy júzege asyrylyp jatyr.
«Respýblıkalyq bıýdjetten qarjylandyrylǵan nysandardyń jumysy árdaıym depýtattar baqylaýynda. Ásirese, aýdandardyń, shalǵaı aýyldardyń áleýmettik ahýaly basty nazarda bolady. Odan bólek jańa jobalar boıynsha da halyq arasynda túsindirý jumystaryn da júrgizip jatyrmyz», dedi A. Raý.
Beıimbet Maılın aýdanynda qosalqy sharýashylyqtar men aýyl sharýashylyǵy kooperatıvterin damytý úshin shaǵyn nesıeler berý arqyly aýyl halqynyń tabysyn arttyrýdyń pılottyq jobasyn iske asyrý boıynsha jumystar júrgizilýde.
Sapar barysynda depýtat Beregovoe aýylyndaǵy gazben jabdyqtaý júıesiniń qurylysymen tanysty. Nysandar partııanyń saılaýaldy baǵdarlamasyn iske asyrýdyń Jol kartasy sheńberinde qurylys jumystary qarqyndy júrgizilýde.