Astanada Jýrnalıster saıabaǵy ashylǵannan keıin sán-saltanaty kelisken alańda ile-shala alǵashqy is-shara da ótip úlgerdi. Atap aıtqanda, «Qazaq gazetteri» JShS qyzmetkerlerine kásibı mereke – BAQ qyzmetkerleri kúni qarsańynda taǵaıyndalǵan marapattardy tabystaý saltanaty ótti.
«Sizder halyq pen bılik arasynda dáneker bolyp, eldiń júgin arqalap júrsizder. Aldaǵy ýaqytta da tek jemisti eńbek etip, aqıqattyń jarshysy bola berińizder», degen seriktestiktiń bas dırektory Dıhan Qamzabekuly Aqparat jáne qoǵamdyq damý mınıstrliginiń «Aqparat salasynyń úzdigi» tósbelgisin bas dırektordyń birinshi orynbasary Vladımır Kýrıatovqa, «Egemen Qazaqstan» gazetiniń aǵa tilshisi Azamat Esenjolǵa jáne redaksııa qyzmetkeri Baqytjamal Qaıypjanovaǵa tabystady.
Sonymen qatar, «Egemen Qazaqstan» gazetiniń Soltústik Qazaqstan oblysyndaǵy menshikti tilshisi Jaqsybaı Samrat Aqparat jáne qoǵamdyq damý mınıstrliginiń «Eńbek ardageri» medalimen marapattalsa, bas redaktordyń orynbasary Baný Ádiljanǵa Prezıdenttiń Alǵys haty tabys etildi.
Budan bólek, Aqparat jáne qoǵamdyq damý mınıstriniń Qurmet gramotasymen Dúısenáli Álimaqyn, Ásem Nasımova, Perızat Nurbekova, Aqparat jáne qoǵamdyq damý mınıstriniń Alǵys hatymen Baýyrjan Kársultanov, Aınur Beıbithan marapattaldy. «Egemen Qazaqstan» gazetiniń tilshisi Eskendir Zulqarnaıǵa Ishki ister mınıstrliginiń gramotasy berildi. Sonymen qatar merekege oraı uıymdastyrylǵan sporttyq jarystarda jeńimpaz jáne júldeger atanǵan redaksııa qyzmetkerleri maqtaý qaǵazdarymen marapattaldy.