Shebir aýyldyq okrýginiń ákimdigi azyq-túlik dúkenderiniń jumys ýaqytyn negizsiz shektegen bolyp shyqty. Sybaılas jemqorlyqqa qarsy qyzmet departamenti basshysynyń Mańǵystaý oblysy boıynsha birinshi orynbasary Birjan Haırýllınniń málimdeýinshe, «Atameken» kásipkerler palatasy men Mańǵystaý aýdanynyń prokýratýrasy birlesip Shebir aýyldyq okrýgi ákimdiginiń is-áreketine shaǵymdanǵan azyq-túlik dúkeni ıesiniń ótinishin qarady.
«Shebir aýyldyq okrýginiń ákimdigi azyq-túlik dúkeniniń jumys ýaqytyn kúzgi-qysqy kezeńde saǵat 23:00-ge deıin, kóktemgi-jazǵy kezeńde saǵat 23:30-ǵa deıin negizsiz shektegeni anyqtaldy. Osylaısha, Shebir aýylynyń ákimdigi kásipkerlik sýbektisine kedergi keltirgen. Tıisti organdardyń aralasýynan keıin ákimdik buryn jarııalanǵan nusqamalyq hattyń kúshin joıdy. Nátıjesinde aýylda osyndaı problemaǵa tap bolǵan toǵyz dúken ıesine kómek kórsetildi», dedi ol.
Sondaı-aq departament kásipkerler úshin shekteýler jasaǵany úshin ákimdiktiń bas mamanyna «eskertý» túrinde tártiptik jaza jarııalanǵanyn atap ótti. Al aýyl ákimi laýazymdy tulǵa bola tura kásipkerlikke zańsyz aralasqany úshin 345 myń teńge kóleminde aıyppul tóledi.
«Bıznesti qorǵaý sybaılas jemqorlyqqa qarsy qyzmettiń negizgi baǵyttarynyń biri bolyp tabylatynyn atap ótken jón. Eger siz baqylaýshy organdardan ruqsat alý, sondaı-aq memlekettik qoldaý, atap aıtqanda nesıe, grant, sýbsıdııa alý kezinde naqty problemalar men ákimshilik kedergilerge tap bolsańyz, bul týraly Sybaılas jemqorlyqqa qarsy qyzmetke habarlaýǵa bolady», deıdi Birjan Haırýllın.
Aqtorǵyn О́tesbaı