«Atameken» ulttyq kásipkerler palatasy Astana, Almaty jáne Shymkent qalalaryndaǵy ámbebap bazarlardy modernızasııalaý boıynsha merzimdi uzartý týraly birneshe ret másele kótergen bolatyn. Zań boıynsha merzim 2023 jylǵy 1 qańtarda aıaqtalǵan edi.
Palata sarapshylarynyń aıtýynsha, jańǵyrtý jalǵaspasa, onda myńdaǵan saýda oryndary jabylyp qalýy múmkin. Osyǵan baılanysty on myńdaı kásipker men onyń otbasy tabyssyz qalýy yqtımal. Eske salaıyq, jańǵyrtý kóshedegi dúńgirshekterdi, konteınerlik pavılondardy saýda úıleri nemese saýda úıleri túrindegi zamanaýı nysandarǵa aýystyrýdy qarastyrady.
Osy rette «Atameken» alańynda Saýda jáne ıntegrasııa vıse-mınıstri Arman Shaqqalıevtiń qatysýymen jıyn ótti. Mınıstrlik ókiliniń sózinshe, Parlament Májilisiniń qaraýynda jatqan kásipkerlik máseleleri boıynsha túzetýlerdiń toǵyzynshy paketi aıasynda «Atameken» bastamasymen jańǵyrtý merzimin 2025 jylǵa deıin uzartý jaıy talqylanyp jatyr. О́z kezeginde mınıstrlik te bul bastamaǵa qoldaý bildirip, ony Májilis aldynda palatamen birlese qorǵaýǵa nıetti.
«Biz palatamen birge osy másele boıynsha jumys istedik. Zań jobasynda modernızasııa merzimi 2025 jylǵy 1 qańtarǵa deıin dep kórsetilgen. Eshkim qazir sizdi jaýyp tastaımyz dep aıta almaıdy. Sonymen qatar Jol kartasy boıynsha mindetteme kúshin joımaıdy», dedi vıse-mınıstr.
Aıta ketý kerek, Jol kartasy saýda salasynda jeke kásipkerlikke qoldaý kórsetý maqsatynda «Jeke kásipkerlikti memlekettik qoldaýdyń keıbir sharalary týraly» Qazaqstan Respýblıkasy Úkimetiniń 2019 jylǵy 31 jeltoqsandaǵy №1060 qaýlysyna ózgerister engizý jónindegi tarmaqty da kózdeıdi.
Jol kartasynda kózdelgen is-sharalardy iske asyrý naryqtardy modernızasııalaý barysyna turaqty monıtorıngti qamtamasyz etýge múmkindik berýge tıis.