11 shilde kúni Ulttyq ulannyń aqparattyq-nasıhat toby ShQO-ǵa bastap kelgen Ulttyq ulan Bas qolbasshysynyń Tárbıe jáne áleýmettik-quqyqtyq jumystar jónindegi orynbasary, Halyq qaharmany, general-maıor Qaırat Úmbetov bir top ónerpazdarmen birge Glýbokovskıı aýdany Solnechnoe kentindegi qarttar úıine bardy, dep jazady Egemen.kz QR Ulttyq ulannyń baspasóz qyzmetine silteme jasap.
Bul joly aqparattyq-nasıhat tobymen birge zapastaǵy polkovnık Aıdar Orazbaev jáne ShQO Polısııa departamenti bastyǵynyń orynbasary polısııa polkovnıgi Medet Berdimuratov boldy.
Áskerdiń Bas tárbıeshisi qarııalardyń hál-jaǵdaıymen tanysyp, Astana kúni merekesimen quttyqtady.
«Biz sizderge byltyr da kelgenbiz. Bıyl da О́skemende aqparattyq-nasıhat tobynyń jumysy jalǵasýda. Keshe Ulttyq ulan Án-bı ansamliniń qatysýymen 5518 áskerı bóliminde birinshi konsertimizdi ótkizdik. Al búgin sizderge Astana kúni mereıtoıy qarsańynda merekelik kóńil-kúı syılap ketýdi jón kórdik. Sizdermen baılanysymyz úzilmeıdi», dedi Qaırat Jarylǵasynuly.
Sondaı-aq general-maıor Qaırat Úmbetov Shyǵys Qazaqstan oblysy jumyspen qamtý jáne áleýmettik baǵdarlamalardy úılestirý basqarmasynyń «О́skemen arnaıy áleýmettik qyzmet kórsetý ortalyǵy» kommýnaldyq memlekettik mekemesine arnaıy ákelgen syılyǵyn tartý etti.
«120 qartty baǵyp-qaǵyp otyrǵan bizdiń mekememizge Halyq qaharmanynyń kelýi úlken mártebe. Bizge qaraı atbasyn burǵandaryńyzǵa qýanyshtymyz. Kelgen qadamdaryńyz qutty bolsyn! Án-bı ansambliniń qyz-jigitterine de aıtar alǵysymyz aıryqsha. О́nerlerińiz ústem bolsyn!», dedi qarttar úıiniń dırektory Erbolat Oshaqbaev.
Jyly lebizge toly júzdesý konserttik baǵdarlamamen jalǵasty. Sahna shymyldyǵy bard ánshi Ashat Ámirǵalıdiń oryndaýyndaǵy «Aq mahabbat» ánimen ashyldy. Kelesi kezekte jyrshy Sáken Álimhan «Jeldirme» termesin oryndady. Al ánshi Dıhan Ilıashev «Qazaq osy» ánin shyrqady. Kórermender hormen aıtylǵan ánderdi uıyp tyńdady. «Dáýir» trıosy aqsaqaldar men aq jaýlyqty analardyń jastyq shaǵynan syr shertetin eski ánderdi áýeletti.
«Ári áskerı qyzmetker, ári ánshi qyz-jigitterdiń ónerine tánti boldyq. Solıst Denıs Iаkovlev «Qusnı Qorlan» ánin qazaq tilinde shyrqaǵanda kózime jas uıalady. Talaby taýdaı jastarǵa basymdy ıip, osyndaǵy úlkenderdiń atynnan alǵys aıtamyn. Qyzmette tabysty bolyńdar! Joldaryń ashyq, baqytty bolǵaısyńdar!», dedi Tursyn Qýsanova esimdi zeınetker.
Osydan keıin ónerpazdar qarııalardy ortaǵa alyp estelik sýretke tústi. Kópti kórgen úlkender jaǵy qonaqtarǵa batasyn berip, alǵysyn jaýdyrdy.