QR Parlamenti Senatynyń depýtattary Ernur Áıtkenov pen Altynbek Nýhuly Ekibastuzdaǵy jylý energetıka ortalyǵyna baryp, jóndeý-qalpyna keltirý jumystarynyń barysymen tanysty, dep habarlaıdy Egemen.kz.
Depýtattar JEO-da jóndeý-qalpyna keltirý jumystary júrip jatqan ýchaskelerdi qarap, jylý berý maýsymyna daıyndyq úderisine kýá boldy.
Stansııada barlyq 10 qazandyqty jóndeý qarastyrylǵan, onyń ishinde 8 qazandyqta kúrdeli jóndeý jumystary jasalatyn boldy. Sý jylytatyn 5 qazandyqqa bıýdjet qarjysy esebinen kúrdeli jóndeý júrgiziledi. Sondaı-aq 5 energetıkalyq qazandyqty, qosalqy jabdyqtardy, ǵımarattar men qurylystardy kúrdeli jáne aǵymdaǵy jóndeý jumystaryn jasaý josparlanyp otyr.
«№7 jáne №9 qazandyqtardy jóndeý 1 shildede aıaqtaldy. №6 energetıkalyq qazandyq pen sý jylytatyn 5 qazandyqta jóndeý jumystary jalǵasýda. Ol jumystar 18 tamyzda aıaqtalady. №11, 14, 15 sý jylytý qazandyqtarynda bólshekteý jumystary aıaqtaldy. Bul máseleni biz baqylaýda ustaımyz», dep atap ótti senatorlar.