Torqaly toıdyń mártebeli marapaty

Astana qalasynyń ákimdigi qoldaǵan baıqaýdyń marapattaý rásimine memleket jáne qoǵam qaıratkerleri, qalam­gerler, zııaly qaýym, beldi jýrnalıster jáne medıasarapshylar keldi. Saltanatty jıyn­da Astana qalasy áki­miniń orynbasary Eset Baı­ken BAQ ókil­derin eńseli elordanyń 25 jyldy­ǵymen qut­tyqtady.

– Osydan 25 jyl buryn Aqmolada nebári 20-ǵa shamalas BAQ quraly bol­ǵan. Qazir 640-tan astam buraqalyq aqparat quraly elordadan habar taratyp otyr. Tarqatyp aıtsaq, 30-dan astam telearna, 490-nan astam basylym jáne 137 ınternet basylym tirkelgen. Prezıdent Qasym-Jomart Toqaev óz isiniń sheberleri, maıtalman jýrnalıster árqashan qoldaýǵa ıe bolatynyn aıtqan edi. О́zimiz de osy salaǵa kóńil aýdarýdy bir min­detimiz dep túıdik, – dedi E.Baıken.

Qala basshylyǵy baıqaýdy elorda­nyń tynys-tirshiligi ashyla tús­sin, qala jaıynda tanymdyq materıaldar ja­rııa­lansyn degen nıette uıym­­dastyrǵan. Baıqaýǵa bas-aıaǵy 100-den astam ótinish túsken. Olardy jýrnalıstıka salasynyń maıtalmandarynan quralǵan qazylar quramy muqııat qaraǵan, sara­laǵan. Qýantarlyǵy, baıqaýǵa tek asta­nalyq áriptester ǵana emes, óńir jýr­nalısteri de qatysyp, júldeli boldy. Jeńim­pazdardy Memleket jáne qoǵam qaıratkeri, elimizdiń tuńǵysh Aqparat mınıstri Qýanysh Sultanov, qala máslıhatynyń tór­aǵasy Erlan Kanalımov, Aqparat jáne qoǵamdyq da­mý vıse-mınıstri Eldar Tolǵanbaev, «Qazaq gazet­­teri» JShS bas dırektory Dıhan Qamzabekuly, «Ha­bar» agenttigi» AQ bas­qarma tóraǵasy Berik Ýálı, radıo jáne telejýrnalıst Qymbat Dosjan marapattady. Sonymen «Úzdik jýrnalıst sarapshy» atalymynda birinshi oryndy «Astana aqshamy» gazetinen Gúlshat Se­raly enshilese, jýrnalıst Arnur Asqar ekinshi oryn aldy. Úshinshi orynǵa «Vechernıaıa Astana» gazetiniń tilshisi Mak­sım Ýdod laıyq dep tanyldy. «Úzdik fotoreportaj» atalymynda Shúkir Shahaı birinshi, Vladıslav Vodnev ekinshi bolsa, úshinshi oryndy «Egemen Qazaqstan» gazetiniń fototilshisi Erlan Omar men «Astana aqshamy» gazetiniń fototilshisi Sultan Seıit qanjyǵalady. Baıqaýda «Áleýmettik jelidegi Asta­nananyń 25 jyldyǵy týraly úzdik materıal», «Úzdik sholýshy», «Úzdik radıoreportaj», «Úzdik telesıýjet», «Úzdik mabılograf» syndy atalymdar boıynsha da júzden júırikter anyqtaldy. Baıqaýda aldyna qara salmaı, birinshi oryn enshilegender 1 mln teńge, ekinshi oryn ol­jalaǵandar 500 myń teńge jáne úshinshi oryn alǵan sala sańlaqtary 300 myń teńge qarjylaı syıaqy aldy.