Jaqynda Italııada ótken baıdarka men kanoe esýden jastar arasyndaǵy álem chempıonatynyń jeńimpazy Marııa Brovkova elge oraldy. Álem chempıonyn oblys ákimi qabyldap, qurmet kórsetti.
Jeńisimen álemdi moıyndatqan sportshyny áýeli áýejaıdan Batys Qazaqstan oblystyq sport jáne týrızm basqarmasynyń basshylyǵy bastaǵan jankúıerler toby qushaq gúlmen qarsy aldy. Basqarma basshysynyń mindetin atqarýshy Jeńis Nyǵmetýllın jeńimpazdy quttyqtap, Batys Qazaqstan oblysynyń ǵana emes, búkil Qazaqstannyń maqtanyshyna aınalǵanyn jetkizdi. «2024 jylǵy Parıj olımpıadasyna joldama alady dep senemiz», dedi J.Nyǵmetýllın.
Aıta keteıik, oraldyq 18 jastaǵy sportshy Italııada ótken dúnıejúzilik dodada bir altyn, bir kúmis jáne bir qola enshiledi.
– Osy jarysta Majarstannan kelgen Agnesa Kısspen saıysý erekshe qıyn boldy. О́te myqty qarsylas. Osy joly jeńilsem de, bolashaqta áli talaı kezdeserime, jeńiske jeterime senemin, deıdi M.Brovkova.
Elimizdiń týyn Italııa aspanynda áýeletken sportshy men onyń jeke jattyqtyrýshysy ári anasy Elena Evgenııqyzyn Batys Qazaqstan oblysynyń ákimi Narıman Tóreǵalıev qabyldap, qurmet kórsetti.
– Bul álem chempıonatyna álemniń 65 memleketinen myńǵa jýyq sportshy qatysty. Osyndaı tartysty básekede elimizdiń sport qorjynyna bir altyn, bir kúmis, bir qola medal salǵan Marııanyń jeńisi – óte úlken jeńis! Mundaı jeńis ońaılyqpen kelmeıdi, bul – talaı jyl tógilgen terdiń, tynymsyz eńbektiń nátıjesi. Bul jeńiste sportshynyń da, jattyqtyrýshynyń da, federasııanyń da úlesi bar. Sondyqtan barshańyzǵa shynaıy alǵysymdy aıtamyn. Osy baǵyttan aınymaı, alǵa basa berińizder, – dedi N.Tóreǵalıev.
Kezdesýde eskek sportynyń óńirdegi keıbir túıtkilderi de sóz boldy. Chempıonnyń anasynyń aıtýynsha, Oral qalasyna eskek sporty kesheni kerek. О́ıtkeni Oral qalasy úsh ózenniń ortasynda turǵanymen, qys kezinde jattyǵý úshin jyly jaqqa ketýge týra keledi. Federasııa bólgen qarajattyń deni issaparǵa ketedi. Buǵan qosa jattyǵý bazasyn da jańǵyrtý qajet. Ǵımarat tozǵan, jóndeý kútip tur. Sondaı-aq jarysqa qajetti júrdek qaıyqtar da jetispeıdi. Álemdik naryqta jaqsy báıge qaıyq 3 myń eýrodan kem turmaıdy eken. Osy jáne basqa da máselelerdi sportshynyń óz aýzynan estigen oblys ákimi jýyq arada chempıonnyń jattyǵý bazasyn óz kózimen kórýge, túıindi máselelerdi sheshýge barynsha kómektesýge ýáde berdi.
Kezdesý sońynda N.Tóreǵalıev M.Brovkovaǵa alǵyshat jáne 500 myń teńgelik sertıfıkat tabys etti.
Aıta keteıik, M.Brovkova 2005 jyly 31 qańtarda Oral qalasynda týǵan. 2022 jyly oblystyq mamandandyrylǵan olımpıadalyq rezervtegi mektep-ınternat-kolledjin bitirgen. 2017 jyldan baıdarka men kanoe esýden BQO qurama komandasynyń múshesi. 2018-2022 jyldary Qazaqstan chempıonattarynyń jeńimpazy hám júldegeri. 2021 jyly Bratıslavada (Slovakııa) ótken halyqaralyq regata jeńimpazy. Taılandta (2022) ótken Azııa chempıonatynyń kúmis júldegeri. Marııa jastar arasynda baıdarka men kanoe esýden eki márte álem chempıony, 2022 jyly Segedte (Majarstan) ótken álem chempıonatynyń jeńimpazy jáne qola júldegeri, 2023 jyly mamyr aıynda da osy qalada álem kýbogynda jeńimpaz atanǵan.
Batys Qazaqstan oblysy