Búginde Shymkent qalasynda 36 myńnan astam azamat avtokólik salyǵyn tólemeı, jaltaryp júr. Saldarynan shahar qazynasy 1,5 mıllıard teńgege jýyq kiristen qaǵylyp otyr, dep habarlaıdy Egemen.kz qazaqstan ulttyq arnasyna silteme jasap.
Qordalanǵan qaryzdardy óndirý maqsatynda shaharda arnaıy reıdtik tekserister bastaldy.
Bereshegine qaramaı Shymkent kóshelerinde júıitkip júrgen avtokólikter osylaı jol polıseıleriniń quryǵyna iligip jatyr. Polısııa departamentiniń jedel basqarý ortalyǵy salyqtan sytylyp ketkisi kelgenderdi aqparattyq baza arqyly birden anyqtaıdy.
Sonymen qatar «Sergek», «Integra» jáne «Qorǵaý» júıesi arqyly da aıyppul tólemegender quryqqa ilinip jatyr. Jalpy Shymkent qalasy boıynsha salyq departamentinde 300 myńdaı avtokólik tirkelgen. Onyń 36 myńnan astamy ótken jylǵy salyǵyn tólemegen.
«Salyq tóleýshilerge bereshegi bar ekendigi týraly habarlama joldanǵan. Olar zańǵa sáıkes 30 jumys kúni ishinde oryndamasa salyq buıryǵy qalyptastyrylady. Ári qaraı ony da oryndamasa salyq buıryǵy jeke sot oryndaýshylarǵa joldanady. Ary qaraı salyq májbúrlep óndiriledi», dedi Abbashan Seıdahmetov, qalalyq memlekettik kirister departamentiniń bas mamany.