QR Aqparat jáne qoǵamdyq damý mınıstrligi, «Qazaqstandyq qoǵamdyq damý ınstıtýty» KeAQ «MediaLab» ortalyǵy elimizdegi medıa jáne kommýnıkasııa salasynda oqıtyn stýdentter men túlekter úshin bir aılyq taǵylymdama uıymdastyrdy, dep habarlaıdy Egemen.kz.
24 shilde - 24 tamyz aralyǵynda ótetin taǵylymdamaǵa arnaıy irikteýden ótken 25 jas tańdaldy. Olar bir aı boıy «Habar Agenttigi» AQ, «Qazaqstan» AQ, «QazContent» AQ, «Qazaq gazetteri» JShS sekildi iri medıa qurylymdarda tájirıbe jınaıdy.
«Qazaq gazetteri» JShS quramyna kiretin «EgemenQazaqstan» gazetinen taǵylymdamadan ótý úshin Batys Qazaqstan, Atyraý, Qyzylorda, Almaty qalalarynda jýrnalıstıka salasy boıynsha bilim alyp júrgen 6 stýdent keldi. Olar basylymnyń «Saıasat jáne quqyq», «Ekonomıka jáne óndiris», «Bilim jáne ǵylym», «Mádenıet jáne ádebıet», «Áleýmet jáne sport» jáne «Internet-redaksııa» bólimderinde taǵylymdamadan ótetin bolady.
Bilimgerlermen arnaıy kezdesken «Qazaq gazetteri» JShS bas dırektory Dıhan Qamzabekuly olarǵa seriktestiktiń jumysy týraly baıandap, taǵylymdamanyń ónimdi, paıdaly bolýyna tilektestik bildirdi. Shyǵarmashylyq ujymmen kezdesýden keıin stýdentter redaksııamen tanysty.
Aıta keteıik, jobanyń maqsaty – medıa jáne kommýnıkasııa baǵytynda bilim alatyn JOO-nyń magıstranttary men stýdentterine tájirıbe jınaý alańyn usyna otyryp, kásibı jáne shyǵarmashylyq ósýine yqpal etý.
Jobanyń mindeti – medıa jáne kommýnıkasııa salasyndaǵy zamanaýı baǵyttardy úıretý, qatysýshylardyń jýrnalıstik daǵdysyn shyńdaý,tálimgerler bekitý arqyly qatysýshylardyń kásibıligin arttyrý, tájirıbe almasý, jas mamandardyń shyǵarmashylyq jáne qoǵamdyq belsendiligin arttyrý.
Taǵylymdama barysynda stýdentter elimizge tanymal medıa mamandarynyń dárisin tyńdaıtyn bolady.