Qazaqstan Respýblıkasy Parlamenti Senatynyń depýtaty Bıbigúl Jeksenbaı elordadaǵy №8 qalalyq emhananyń ujymymen kezdesti, dep habarlaıdy Egemen.kz Senattyń baspasóz qyzmetine silteme jasap.
Júzdesý barysynda senatorǵa medısınalyq mekemeni damytý josparlary týraly jan-jaqty aqparattar aıtyldy.
Dárigerler qoljetimdi baspana baǵdarlamasy, medısına qyzmetkerleriniń demalys kúnderiniń sanyn ulǵaıtý, medısınalyq saqtandyrý jáne dári-dármekterdiń baǵasynyń ósýine qatysty birqatar problemalyq máselelerdi kóterdi.
Bıbigúl Jeksenbaı óz kezeginde parlamentshiler kóterilgen barlyq máselelerdi nazarda ustaıtynyn atap ótti jáne halyqtyń áleýmettik jaǵdaıyn jaqsartý salasyndaǵy Palatanyń zańnamalyq qyzmeti týraly habardar etti.
«Jaqynda jańa Áleýmettik kodeks qabyldandy. Bul elimizdiń áleýmettik saıasatyn jaqsartýdaǵy mańyzy zor qadam ekeni daýsyz. Jańa áleýmettik saıasat – Memleket basshysy jarııalaǵan aýqymdy ózgeristerdiń biri bolyp tabylady. Ár otbasynda jańa sıfrlyq kartanyń bolýy, jumyspen qamtý salasynda jańa tásilderdi engizý jáne arnaýly áleýmettik qyzmetter júıesin jetildirý de sondaǵy jańalyqtardyń ishinde. Bul bizdiń otandastarymyzdyń ómirine de, sala qyzmetkerlerine de oń áserin tıgizedi», dep atap ótti senator.