Astananyń Nura aýdanynda altynshy ardagerler keńesi quryldy. Onyń tóraǵasy bolyp 70 jastaǵy akademık Aıtmaǵambet Aıpov saılandy, dep habarlaıdy Egemen.kz qala ákimdiginiń resmı saıtyna silteme jasap.
Qoǵamdyq birlestik zeınetkerlerdiń, ardagerlerdiń quqyqtary men múddelerin qorǵaýmen, aǵa býynnyń bos ýaqytyn tıimdi uıymdastyrýmen aınalysatyn bolady. Ardagerler keńesiniń qyzmeti búkil aýdandy, onyń ishinde Úrker eldi mekenin de qamtymaq.
«Búginnen bastap aýdannyń zeınetkerleri men ardagerlerin biriktirý úshin jumys isteıtin bolamyz. Bizge áleýmettik, mádenı jáne qoǵamdyq máseleler boıynsha júginýge bolady. Mesenattarmen birge áleýmettik az qamtylǵan, jalǵyz turatyn zeınetkerlerge qamqorlyq kórsetemiz. Sondaı-aq qalalyq mekemeler janyndaǵy ardagerler ortalyqtary men uıymdaryn odan ári damytatyn bolamyz. Ardagerler keńesiniń múshelerine senim bildirgeni úshin alǵys aıtamyn», dep atap ótti Aıtmaǵambet Aıpov.
Qazirgi ýaqytta elordada 128 myńnan astam zeınetker bar. Zeınetkerlik jasqa tolǵan árbir adam turatyn jeri boıynsha ár aýdandaǵy ardagerler keńesiniń qatyryna qosyla alady. Budan bólek, jalpy qala boıynsha qyzmet etetin ardagerler keńesi de bar.