Bul kúnderi elordadaǵy «Beeline arena» ulttyq tennıs ortalyǵynda Prezıdent kýbogi aıasyndaǵy «ATP Challenger Tour» jáne «ITF World Tennis Tour» týrnırleri ótip jatyr.
2007 jyldan bastap halyqaralyq mártebege ıe bolǵan Prezıdent kýbogi jarysynyń ekinshi kúninde úsh otandasymyz kortqa shyǵyp, úsheýi de jarystyń ekinshi aınalymyna joldama aldy. Álemdik reıtıngte 375-orynda turǵan 26 jastaǵy Dmıtrıı Popko alǵashqy kezdesýin túrkııalyq Koraı Kırchımen ótkizip, qarsylasyn úsh setke jalǵasqan oıynda 6:4, 4:6, 6:1 esebimen tize búktirdi. Popko shırek fınalǵa shyǵý úshin keshe ózbekstandyq Hýmaıýn Sultanovpen sheberlik baıqasty.
Sonymen qatar byltyrǵy Prezıdent kýbogi jarysynyń fınalısi Denıs Evseev jańazelandııalyq Adjıt Raıden eki sette (6:4, 6:1) basym tústi. Onyń kelesi qarsylasy – Izraıl ókili Orel Kımhı. 19 jastaǵy otandasymyz Islam Orynbasar álemniń 616-raketkasy úndistandyq Prdjval Devti (6:4, 1:6, 6:3) jarys jolynan yǵystyryp, týrnırdiń kishigirim sensasııasyn tirkedi. Islam ekinshi aınalymda osy jarystyń 2-raketkasy retinde tirkelgen jańazelandııalyq Bendjamın Lokpen kúsh synasady.