Abaı oblysynyń Besqaraǵaı aýdanynda 15 shildede tutanǵan orman órti qolaısyzdyqtarǵa baılanysty 11 kúnge sozylyp, 26 shildede tolyq sóndirildi, dep habarlaıdy Egemen.kz.
15 shildede órtke qarsy qyzmetke Begenev ormanshylyǵynda qurǵaq shóptiń órtenip jatqany jáne orman qoryna qaýip bar ekeni týraly habarlama túsken bolatyn. «Semeı Ormany» MOTR jáne Abaı oblysy TJD qyzmetkerleri dereý oqıǵa ornyna barǵan.
«26 shilde kúni saǵat 18:00-de Besqaraǵaı aýdanyndaǵy orman órti 385 gektar alqapta tolyǵymen sóndirildi», dep habarlady Abaı oblysy TJD baspasóz qyzmeti.
TJD ókilderiniń aıtýynsha, joǵary aýa temperatýrasy, qatty jel, tyǵyz ósetin daqyldardyń bolýy, tuzdy jáne batpaqty jerlerdiń bolýy órt sóndirý jumystaryn qıyndatqan. Atalǵan qolaısyzdyqtarǵa qaramastan úılesimdi is-qımyl arqasynda órt tolyǵymen sóndirildi.