Bıyl týǵanyna 155 jyl tolyp otyrǵan ótken ǵasyrdyń jetpisinshi jyldary Qazaqstannyń halyq jazýshysy, aqyn-dramatýrg, fılologııa ǵylymynyń doktory Ábdilda Tájibaev «Abaıdan keıingi uly aqyn» dep baǵa bergen Aqyt qajy Úlimjioǵlynyń kúmis júzigi urpaqtarynyń qolynda saqtalǵany týraly «Argau.kz» saıty birshama ýaqyt buryn jańalyq taratqan edi.
Rasynda Aqyt aqyn (1868–1940 j.) artyna tek júzigin ǵana qaldyrmaı, nárli sózin de urpaqqa amanat etken úlken ǵulama-jyrshy. Mońǵolııa qazaqtarynyń ádebıetin zerttep, ǵylymı aınalymǵa engizgen fılologııa ǵylymdarynyń doktory, professor Qabıdash Qalıasqaruly: «1891 – 1914 jyldary Sankt-Peterbýrg, Qazan baspalarynan Aqyt qajy Úlimjioǵlynyń toǵyz kitaby jaryq kórgen. Sonymen qatar onyń shyǵarmalary «Altaıskıı» degen búrkenshik atpen «Aıqap» jýrnalyna jarııalanyp turǵan. Bul kisiniń ereksheligi – halyqqa ıslam ilimin jyrmen nasıhattaǵan oıshyldyǵy. О́leńin alýan yrǵaqta nasıhat, nazıra, ǵaqlııa túrinde jazǵan. О́zine Abaıdy ustaz tutyp, ol kisige eliktep «Dáleılýl-ǵaqylııa» atty asa qundy aqylı-jyr toptamasyn jazyp shyqqan. Sondaı-aq, artyna asa mol ádebı mura qaldyrǵan úlken qalam ıesi» dep jazypty (Q.Qalıasqaruly: «Halyq aqyndary», О́lgeı, 1973 jyl. 89 b).
Al ǵulamadan qalǵan qundy mura júzikke keletin bolsaq, joǵarydaǵy saıtqa jádiger jaıly málimet bergen Shyńjan-Altaı óńirinde turatyn Aqyt qajynyń nemeresi Ryshan Allajaruly bylaı deıdi: «Atamyzdy 1939 jyly kúzde juma kúni Shákýirtidegi meshitinde qytaı úkimeti tutqyndap, Sarysúmbe qalasyna áketetin bolady. Meniń ákem Allajar óz ákesi Aqyt atamdy jalǵyz jibermeı birge attanǵan eken. Sodan qalaǵa tústik jer qalǵanda qajy atamyz birge kele jatqan ulyna «Balam, sen osy jerden qaıt, úkimetke halyq emes men kerekpin, halyqtyń aýyrtpalyǵy menimen ketetin shyǵar. Sender jaman bolmaısyńdar», dep batasyn berip, qolyndaǵy júzigin saýsaǵynan sýyryp alyp, basyna orap kele jatqan sharshy shytyna orap qolyna ustatypty. 1970 jyldary kóne muralarǵa qyrǵıdaı tıgen «Mádenıet tóńkerisi» kezinde bizdiń qajy atamyzdyń jalǵyz kózi júzikten aıyrylyp qalmas úshin, apam marqum shúberekke orap meniń belime baılap saqtady» dese, qazirgi tańda Shyǵys Qazaqstan oblysy Kúrshim aýdany ortalyǵyna 2007 jyly Qytaı elinen kóship kelgen Aqyt qajynyń taǵy bir nemeresi Shápek ata: «Meniń estýim boıynsha, bul júzikti atamyzǵa Buharadan kelgen Myrzabaqa deıtin ustazy syılaǵan eken. Bul kisi atamyzǵa arab, parsy, túrk tilderin úıretýmen qatar, ıslamnyń fıqh negizderin oqytypty. El aýzyndaǵy áńgimelerge qaraǵanda ustazy Aqyt atama «men saǵan bar biletinimdi úırettim, budan ári oqytýǵa dármenim joq» dep, rızashylyǵyn bildirip osy júzigin syılaǵan deıdi. Bala kezimizde aýyrǵan adamdar osy júzikti kesedegi sýǵa salyp, «bısmıllasyn» aıtyp ishetin. Qudaıdyń qudireti kóbi dertinen saýyǵyp ketetin» deıdi.
Júziktiń óń betinde Quran qaripteri oıyp jazylǵan. Mundaǵy arab qaripterimen tanysqan «Nur – Múbárak» ýnıversıtetiniń doktoranty, tanymal ıslamtanýshy Qýat Qabdolla: «Munda keıbir Quran súreleriniń basynda turatyn mýkatta áripteri tańbalanypty. Osyndaı mýkatta áripterimen bastalatyn Quranda 30-ǵa tarta súre bar. Bul áripter keıde eki (ıa-sın) nemese úsh (álip-lám-mım) qosar dybysty, sondaı-aq jeke-dara dybysta (kaf) jazylady. Bul mýkatta áripterdiń maǵynasy tek bir Allaǵa aıan. Osyndaı Quran súreleriniń aldynda turatyn mýkatta dybystar sany – 14. Myna júzikte barlyǵy túgel bádizdelipti. Mundaı mýkatta áripter tańbalanǵan jádiger qasıetti sanalady», deıdi.