Sybaılas jemqorlyqqa qarsy qyzmet burynǵy Indýstrııa jáne ınfraqurylymdyq damý vıse-mınıstri T.Toqtabaevqa qatysty laýazymdyq ókilettikterin asyra paıdalaný faktisi boıynsha sotqa deıingi tergeýdi aıaqtady, dep habarlaıdy Egemen.kz.
ANTIKOR baspasóz qyzmeti málim etkendeı, ol Qostanaı oblysyndaǵy qatty paıdaly qazbalardyń (nıkel jáne kobalt) iri qorlary anyqtalǵan «Shevchenkovskoe» ken ornyn barlaý syltaýymen affılıırlengen tulǵalarǵa aýksıonsyz zańsyz bergen dep aıyptaldy.
«Nátıjesinde, onyń baqylaýyndaǵy kompanııa qol qoıý bonýsynyń eń tómengi qunymen óndirýge daıyn ken ornyn alǵan. О́ziniń álemdik qorlary boıynsha biregeı nıkel jáne kobalt túrindegi qatty paıdaly qazbalar 100 mln tonna 5,7 trln teńge somasyna baǵalanady. Tergeý barysynda qabyldanǵan sharalarmen atalǵan ken orny memleket paıdasyna qaıtaryldy», delingen habarlamada.
Qazaqstan Respýblıkasynyń Bas prokýratýrasy aıyptalýshy T.Toqtabaevty sotqa berdi.
Qylmystyq-prosestik kodeksiniń 201-babyna sáıkes ózge aqparat jarııa etýge jatpaıdy. Konstıtýsııanyń 77-baby 3-tarmaǵynyń 1-tarmaqshasyna jáne Qylmystyq-prosestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.