Memleket basshysy Qasym-Jomart Toqaev Básekelestikti qorǵaý jáne damytý agenttiginiń tóraǵasy Marat Omarovty qabyldady. Bul týraly Aqorda baspasóz qyzmeti habarlady, dep jazady Egemen.kz.
Prezıdentke bıylǵy birinshi jartyjyldyqtaǵy básekelestik jaǵdaıy jáne negizgi taýar naryqtaryndaǵy básekelestikke kedergi keltiretin tosqaýyldar jóninde esep berildi.
Memleket basshysyna monopolııaǵa qarsy tergeý amaldarynyń aralyq nátıjeleri, ekonomıkany monopolııadan aryltý jáne básekelestikti damytý úshin qabyldanǵan sharalar, sondaı-aq monopolııaǵa qarsy organnyń rólin kúsheıtý máselesi týraly baıandaldy. Jyl basynan beri monopolııaǵa qarsy zańnamany buzý derekteri boıynsha 48 isti tergeý aıaqtaldy. Sondaı-aq 33 is tergelip jatyr. Bul rette josyqsyz naryq sýbektilerine 3,5 mıllıard teńgeden astam aıyppul sanksııasy salyndy. Sottyń qaraýynda 40-tan astam monopolııaǵa qarsy is bar.
Kezdesý sońynda Qasym-Jomart Toqaev el ekonomıkasynyń negizgi salalaryn monopolııadan aryltý jónindegi keshendi sharalardy júzege asyrý isin jalǵastyrýdy jáne básekelestikti damytý boıynsha qosymsha usynystar daıyndaýdy tapsyrdy.