Qıyn-qystaý zamanda jetisýlyqtar koreı halqyn baýyryna bassa, búginde olar medısına salasynda otandyq dárigerlermen tájirıbesin bólisip keledi. Bul ıgilikti is Jetisý jerinde jylda qaıtalanyp, turǵyndar úshin úlken kómek bolyp otyr. Osy rette Ońtústik Koreıa mamandary Taldyqorǵanǵa kelip, 33 operasııa jasady.
Ońtústik Koreıa eliniń medısınasy álemniń úzdik emdeý ortalyqtaryna jatady. Sondyqtan dástúrli túrde bir top bilikti dáriger jylda Taldyqorǵanǵa kelip, mamandarǵa keńes beredi. Buǵan qosa ártúrli operasııa jasap, syrqattardyń jaıyna úńiledi. Alystaǵy turǵyndardy qabyldap, em-dom sharasyn uıymdastyrady.
Oblystyq Densaýlyq saqtaý basqarmasynyń málimetinshe, bul – Hıonde gospıtali dárigerleriniń Jetisý óńirine osymen tórtinshi ret kelýi. Gospıtal dırektory Kım Bý Sop bastaǵan mamandar bes kún ishinde myńnan asa turǵyndy tekserýden ótkizip, travmatologııa men hırýrgııa baǵytynda 33 operasııa jasady.
Hıonde gospıtalynyń dırektory Kım Bý Soptyń aıtýynsha, arnaıy top quramynda gospıtaldiń jáne «Chýng-Ang» ýnıversıtetiniń medısınalyq ortalyǵynyń neırohırýrg, hırýrg, terapevt, hırýrg-travmatolog jáne shuǵyl medısınalyq kómek kórsetetin 50 shaqty mamany bar. Olar mundaı qaıyrymdylyq aksııasyn jylda ótkizetinin aıtady.
«1930 jyldary Qazaqstanǵa jer aýdarylyp kelgen koreı halqyna ashtyq kezinde qazaqtar úlken kómek kórsetti. Qazaqtarǵa alǵys bildirý, eki el arasyndaǵy dostyqty nyǵaıtý úshin biz jyl saıyn kelip, dárigerlermen tájirıbe almasyp, tegin tekserýler men operasııalar jasaımyz», dedi gospıtal dırektory.
О́ńir ákiminiń baspasóz qyzmetiniń málimetine súıensek, 2018 jyly oblys ákimdigi, Qazaqstan halyqtary assambleıasy jáne Qazaqstandaǵy koreı halqy qaýymdastyǵy birlesip Hıonde gospıtalimen Jetisý óńiriniń turǵyndaryn jyl saıyn medısınalyq tegin tekserýden ótkizý týraly memorandýmǵa qol qoıǵan edi. Memorandýmǵa qol qoıylǵan sátten bastap sheteldik mamandar tize, jambas jáne basqa býyndardy aýystyrý boıynsha 50-den asa operasııa jasady. Sonymen qatar Hıonde klınıkasynyń esebinen elimizdiń dárigerleri Ońtústik Koreıada bilim alyp jatyr.
Taldyqorǵan qalalyq kópsalaly aýrýhanasynyń dırektory Asqar Sadyqov koreı eliniń dárigerleri travmatologııalyq, hırýrgııalyq operasııalar jasaýmen qatar, tájirıbe almasyp, jańa dári-dármekter men medısınalyq jabdyqtardy engizý týraly aqparatpen almasyp otyratynyn aıtty.
«2018 jyldan bastap bizdiń birqatar qyzmetkerimiz jáne birneshe aýdandyq aýrýhanalardyń mamandary Hıonde gospıtalinde biliktilikti arttyrý kýrstaryna qatysty. 4 jyldan beri mamandar eriktilermen, jetekshi professorlarmen jáne klınıkanyń dırektorymen birlesip bizdiń aýrýhanaǵa kelip, konsýltasııalyq-dıagnostıkalyq kómek kórsetip keledi. Sondaı-aq birqatar hırýrgııa jáne travmatologııa salasy boıynsha operasııa jasaldy», dedi A.Sadyqov.
Osy sapar aıasynda Jetisý oblysynyń ákimdigi men Koreıa Respýblıkasy Hıonde gospıtali jáne «Chýng-Ang» ýnıversıtetiniń medısınalyq ortalyǵy halyq densaýlyǵyn jaqsartý, eki el arasyndaǵy yntymaqtastyqty nyǵaıtý maqsatynda memorandýmǵa qol qoıdy. Memorandým negizinde eki eldiń mamandary travmatologııa, hırýrgııa jáne radıologııa salalary boıynsha birlese jumys atqarady.