Balalarǵa arnalǵan horeografııalyq qoıylym qazirgi qoǵamdaǵy ózekti máseleniń biri – óskeleń urpaqtyń gadjetterge táýeldiligi taqyrybyn qozǵaıdy. Osyndaı kúrdeli taqyrypty rejısserler men avtor qarapaıym bı tilimen jetkizgen. Spektaklde kórsetilgendeı, shynaıy ómirde de kóptegen ata-ana zaman aǵymyna eliktep, balanyń sábı kezinen bastap ulttyq qundylyqtarǵa, tálim-tárbıege qyzyǵýshylyǵyn oıatýdyń ornyna, kóńilin gadjet berip tabady. Bul áreketiniń sońy nemen aıaqtalýy múmkin ekeni oıyna da kirip shyqpaıdy.
Balalardyń saǵattap ǵalamtor keńistiginde otyrýynyń densaýlyǵyna orasan zor zardaby tıetini belgili. Budan da soraqysy – ǵalamtor jelisinde balanyń áli qatpaǵan psıhıkasyn buzatyn oıyndar, beınerolıkter, trendter qoljetimdi bolyp, ata-ananyń ornyna «tárbıe berip» jatyr. Munyń tek qana sana ýlaý ekeni aıtpasa da túsinikti.
Smartfon ekranynyń syrtynda otyrǵandar balalardyń ańqaýlyǵyn paıdalanyp, olardy túrli tyıym salynǵan uıymdarǵa, sektalarǵa kirgizip, mıyn ýlaıdy. Senimine kirip, quldyqqa, donorlyqqa satyp jiberetin uıymdar da jetip artylady. Olardyń qarmaǵyna ár balanyń túsý qaýpi bar. Tipti áleýmettik jelilerdegi pedofılderdiń ózi qanshama balanyń, jasóspirimniń janyna jazylmas jara salyp jatyr. О́kinishke qaraı, bizdiń qoǵamda bul zardapty máseleni eshkim qolyna naqty alyp, sheshýge tyrysyp jatqan joq. Osylaı jalǵasa berse, bul másele áli uzaq ýaqyt boıy ózekti bolyp qala beretini sózsiz.
Al joǵaryda aıtylǵan U SANA spektakli sizdiń balańyzǵa tek jaqsy kóńil kúı syılap qana qoımaı, onyń jaqsy men jamandy ajyratýyna yqpal etedi. Balalar ulttyq qundylyqtardy qasterleýdi úırenip, jelide neshe túrli qaýip-qaterdiń baryn bilip shyǵady. О́z balańyzdyń tárbıesimen dál osy sátten aınalysa bastańyz. Áıtpese tym kesh qalýyńyz múmkin.