Jerge dán seýip, egin ósirgen eldiń «bas aýrýynyń» biri – aramshóp. Eginnen buryn boı kóterip alatyn aramshóptiń jany siri, tamyry myqty. Ony túp-tamyrymen joımasań, eginińniń eńse tiktep, ónim berýi ekitalaı. Taıaýda «Jańa dala» halyqaralyq agrokórmesinde «Shelkovo Agrohım-KZ» kompanııasynyń ǵylymı qyzmetkeri Jeksenbı Qaıyrjanovpen kezdesip, kórme týraly jáne kompanııanyń qyzmeti jóninde oı-pikirin bildik.
Atalǵan kompanııanyń kórmede qurǵan palatkasyna Aýyl sharýashylyǵy vıse-mınıstri Rústem Qurmanov pen Aqmola oblysynyń ákimi Ermek Marjyqpaev jáne kóptegen aýdan, aýyl ákimderi men arnaıy mamandar arnaıy at basyn buryp, túrli zııankes pen aram shópke qarsy dári-dármek jasap kúresýshi qaýymnyń qyzmetimen, sórege qoıǵan ónimderimen egjeı-tegjeı tanysty. Bul kompanııaǵa egin ósirýshiler tarapynan osynshama qyzyǵýshylyq pen yqylasty, iltıpatty kórgen biz jurt aıaǵy basylǵanda ádeıilep kelip sálem berdik. «Egis arasyndaǵy aram shópter men eginge zııan keltiretin barlyq tirshilik ıesiniń jan alǵysh Ázireıili biz bolamyz», dep ázildedi ǵylymı keńesshi.
«Jańa dala» kórmesi aýyl sharýashylyǵynyń jańa tynysyn ashty. Aýyl sharýashylyǵynda eńbek etip júrgen birqatar eldiń mamandary men ǵalymdaryn, kásipkerleri men túrli kásiporyndarynyń jaqyndasýyna, qarym-qatynasyn nyǵaıtýyna negiz boldy. Jıyrmaǵa jýyq eldiń sala mamandary men tehnıkalary, jańa tehnologııalary osy kórme alańynda synaqtan ótip, óz múmkindigin kórsetip, jańa tutynýshysyn taýyp jatyr. Munda tek egis alqabynda jumys isteıtin tehnıkalar ǵana emes, jerden ósirip-óndirilgen ónimniń bárin adam aldyna as bolyp barǵanǵa deıin qoldanylatyn zaýyt-fabrıkalarǵa kerek-jaraqtyń barlyǵy derlik bar. Anaý aspanda ushyp júrgen drondar da egistiń ıgiligi úshin kóktiń júzin súzip júr», dedi J.Qaıyrjanov.
Onyń aıtýyna qaraǵanda, qurylǵanyna 14 jyl bolǵan agrohım kompanııasy da osy «Jańa dala» kórmesi arqyly jyl saıyn ónimin otandyq jáne sheteldik dıqandarǵa keńinen tanystyryp, eki tarapqa da paıda keltiretin kelisimderge qol jetkizip júr eken.
«Shelkovo Agrohım-KZ» kompanııasy qurylǵan birinshi kúninen bastap jumys istep kele jatyrmyn. Bir sózben aıtqanda, kompanııanyń irgetasyn qalaýshylardyń birimin. Isti bas dırektorymyz Tatıana Bolgovamen birge bastadyq. Kompanııanyń qurylǵanyna kelesi jyly 15 jyl bolady. Osy ýaqyt aralyǵynda úlken tabysqa jettik. Qazaqstandaǵy belgili kompanııalardyń birine aınalyp úlgerdik. Qazir Qazaqstan boıynsha saladaǵy iri úsh kompanııanyń biri – «Shelkovo Agrohım-KZ» JShS», dedi ǵalym.
Kompanııanyń ortalyq ofısi Astanada bolǵanymen, Pavlodar, Petropavl, Qostanaı, Kókshetaý, Almaty qalalarynda bólimsheleri bar eken.
«Biz aýyl sharýashylyǵynda egis arasyndaǵy aramshópterge qarsy, túrli aýrýǵa qarsy, basqa da zııankesterdi joıatyn dári-dármek daıyndaımyz. Kompanııa negizi Reseı astanasy Máskeýdiń janyndaǵy Shelkovo degen shaǵyn qaladan bastaý alady. Negizgi dári-dármek pen oǵan kerek shıkizatty sol qaladan alamyz. Oǵan qosa osy Aqmola oblysyndaǵy Stepnogor qalasynda ózimizdiń «Progress-selhoz-hım» degen zaýytymyz bar. Shıkizatty Reseıden ákelemiz de, atalǵan kásiporynda qaıta óńdep, aýyl sharýashylyǵyna kerekti dári-dármekterdi jasap shyǵaramyz», dep sózin jalǵady ǵylymı keńesshi.
Qazirgi tańda egistegi aram shóptermen jáne túrli aýrý-keselmen kúresip júrgen kompanııa qyzmetkerleri drondarmen jumys isteýdi meńgerip júr eken.
«Sebebi qazirgi jumystardyń negizgisi dári shashatyn drondarmen atqarylady. Sol úshin ǵalymdarymyz, mamandarymyz ony da meńgerip jatyr. Al qazirgi zamanaýı jas mamandarymyzdyń kópshiligi magıstratýrany bitirgen. Aralarynda PhD doktorlyǵyn qorǵap alǵandary da bar. Osynyń bárin eskersek, bizdegi qyzmetkerlerdiń jartysyna jýyǵynyń ǵylymı ataǵy bar desek bolady», dep sózin túıdi ǵalym.