QR Aqparat jáne qoǵamdyq damý mınıstrligi «Daryn» memlekettik jastar syılyǵyn berý qaǵıdalaryna ózgerister engiziletinin habarlady, dep jazady Egemen.kz.
Atap aıtqanda, «Daryn» memlekettik jastar syılyǵynyń nomınasııasyna «Shyǵarmashylyq bastamalar» qosyldy.
Endi syılyq kelesi nomınasııalar boıynsha beriledi:
1. Ádebıet;
2. Ǵylym;
3. Dızaın jáne beıneleý óneri;
4. Jýrnalıstıka;
5. Klassıkalyq mýzyka;
6. Shyǵarmashylyq bastamalar
7. Sport;
8. Teatr jáne kıno;
9. Trend;
10. Halyq óneri.
Buǵan deıin tizimde «Qoǵamdyq qyzmet» bolǵan.
Sondaı-aq birinshi kezeńde jan-jaqty qarastyrý maqsatynda komıssııa músheleri arasynan «Estrada, klassıkalyq mýzyka, halyq shyǵarmashylyǵy», «Ádebıet, teatr jáne kıno», «Jýrnalıstıka jáne shyǵarmashylyq bastamalar», «Sport», «Dızaın jáne beıneleý óneri», «Ǵylym» baǵyttary boıynsha alty seksııa qurylatyny aıtyldy.
Odan bólek, memlekettik syılyqty berý sharttary da ózgeretini qosa habarlandy. Dálirek aıtqanda, ýákiletti organ Komıssııa sheshimi negizinde jyldyń 10 jeltoqsanyna deıin (buryn 15 qazanǵa deıin) syılyqaqy taǵaıyndaý týraly buıryq shyǵarady.
Júldeni berý týraly buıryq Táýelsizdik kúnine (16 jeltoqsan) deıin buqaralyq aqparat quraldarynda jáne ýákiletti organnyń ınternet-resýrsynda jarııalanady dep kózdelýde. Buǵan deıin ol Respýblıka kúni (25 qazan) jarııalanǵan bolatyn.
Marapattar Táýelsizdik kúnine arnalǵan saltanatty jaǵdaıda tabys etiledi.
Ýákiletti organ aqshalaı syılyqty tıisti jyldyń 20 jeltoqsanynan keshiktirmeı júlde ıegeriniń banktik shotyna aýdarady.
Qujat 17 tamyzǵa deıin qoǵamdyq talqylaý úshin Ashyq NQA veb-saıtynda ornalastyrylǵan.