5-13 tamyz kúnderi Shotlandııanyń bas shahary – Glazgoda tasjoldaǵy velosporttan álem chempıonatynyń alaýy tutanady. Ulybrıtanııadaǵy saıysta Qazaqstan quramasynyń 18 sportshysy óner kórsetedi.
Tasjoldaǵy velosporttan ótetin álem birinshiliginiń basty ereksheligi, atalǵan sport túriniń barlyq jarysynyń basyn biriktirgen. Iаǵnı veloshabandozdar Glazgodaǵy dodada shossedegi velosport, 23 jasqa deıingiler arasyndaǵy jáne trektegi velosporttan bas júldege talasady.
Shossedegi velosporttan el namysyn halyqaralyq deńgeıde tanymal veloshabandoz Alekseı Lýsenko bastaǵan Evgenıı Fedorov, Igor Chjan, Gleb Brýsenskıı, Dmıtrıı Grýzdev, Rınata Sultanova, Mahabbat Úmitjanova, Faına Potapova sııaqty sportshylar qorǵaıdy. Al 23 jasqa deıingiler arasyndaǵy velojarysta Andreı Remhe, Maksım Taraskın, Ilhan Dostıev, Egor Strelnıkov, Nıkolıa Vınokýrov, Rýslan Alıevke senim artamyz. Sonymen qatar trektegi velosport saıysynda Sergeı Ponomarev, Andreı Chýgaı, Artem Zaharov, Ramıs Dinmuhametov baq synaıdy.
Byltyr Aýstralııanyń Výllongong qalasynda jalaýy jelbiregen álem chempıonatynda jerlesterimiz bir altyn medal jeńip alǵan bolatyn. 23 jasqa deıingiler arasyndaǵy jarysta Evgenıı Fedorov top jarǵan edi.