Aqtóbe polıseıleri shirkeýdegi qaıyrymdylyq qorapshasyna urlyqqa túsken Muǵaljar aýdanynyń 30 jastaǵy turǵynyn ustady, dep habarlaıdy Egemen.kz.
3 tamyz kúni saǵat 15:00 shamasynda M.Mámetova kóshesindegi Áýlıe-Nıkolaı soborynyń shirkeýinde belgisiz adamdar qaıyrymdylyq qorabyn syndyryp, 20 myń teńgege jýyq aqsha urlap ketkeni týraly habarlamaǵa sáıkes dereý oqıǵa ornyna barǵan polısııa qyzmetkerleri aýmaqty tekserip, kýágerlerden jaýap alǵan.
IIM-niń aqparatynda: «Tártip saqshylary shirkeýde ornatylǵan beınekameralardyń kómegimen táýlik ishinde kúdiktini ustady», dep jazylǵan.
QR QK 188- baby boıynsha sotqa deıingi tergeý jumystary bastaldy. Sondaı-aq ustalǵan adamnyń osyǵan uqsas basqa da qylmystarǵa qatysy bar-joǵy tekserilip jatyr.