Búgin Uly Otan soǵysynyń ardageri, Keńes Odaǵynyń eki márte Batyry Talǵat Bıgeldınovtyń týǵanyna 101 jyl tolýyna oraı Qarýly kúshterdiń barlyq ásker túrlerinde jáne joǵary áskerı oqý oryndarynda eske alýǵa arnalǵan is-sharalar ótti, dep habarlaıdy Egemen.kz QR Qorǵanys mınıstrliginiń baspasóz qyzmetine silteme jasap.
Batyr atyndaǵy Áýe qorǵanysy kúshteriniń áskerı ınstıtýtynda erekshe kózge túsken áskerı qyzmetshilerge alǵys jarııalandy.
Áskerı bólimderde merzimdi qyzmettegi sarbazdar úshin «Azat etýshiler» serııasyndaǵy «Shabýyldaýshylar» derekti fılmi kórsetilip, erlik sabaqtary ótkizildi.
Qarýly kúshterdiń memlekettik Áskerı-tarıhı murajaıynda aty ańyzǵa aınalǵan shabýyldaýshy ushqysh Talǵat Bıgeldınovtiń ómiri men qyzmetine arnalǵan fotosýretter men qujattardy qamtyǵan taqyryptyq ekspozısııa uıymdastyryldy.
Talǵat Jaqypbekuly Bıgeldınov 1922 jyly Aqmola oblysy Maıbalyq aýylynda dúnıege kelgen. Balalyq, jastyq shaǵy Bishkekte ótken bolashaq ushqyshtyń kókke degen qushtarlyǵy Frýnzedegi aeroklýbqa eriksiz alyp keldi. Bir jyldan soń ol osy klýbtyń nusqaýshy-ushqyshy bolyp shyǵady. Saratov oblysyndaǵy ushqyshtar daıarlaıtyn Balashov áskerı avıasııalyq mektebin, keıinnen Orynbor avıasııalyq ýchılıshesin támamdady.
Jaýyngerlik jolyn qatardaǵy ushqysh bolyp bastaǵan ol soǵysty gvardııalyq áýe polkiniń eskadrılıa komandıri retinde aıaqtady. Kalının, Voronej, Stepnoı, birinshi jáne ekinshi Ýkraın maıdandarynda soǵysty. 305 ret áýege kóterilip, jaýyngerlik tapsyrmalardy oryndady.
Soǵystan keıin Talǵat Jaqypbekuly Áskerı-áýe akademııasyn bitirip, Ýkraınadaǵy shabýyldaýshy áýe polkinde qyzmet etti. Áskerı-áýe kúshteriniń shabýyldaýshylaryn daıarlaıtyn Krasnodar joǵary mektebinde shtab basqardy. Qazaqstandaǵy azamattyq avıasııa basqarmasy basshysynyń orynbasary bolyp qyzmet etti. О́miriniń sońyna deıin memleket pen qoǵam ómirine belsendi túrde qatysyp, soǵys múgedekterine qoldaý kórsetetin halyqaralyq qorǵa basshylyq jasady.