Bıyl jyl basynan shildege deıingi aralyqta beırezıdentterdiń (bir memlekette zańdy nemese jeke tulǵa sanalatyn, biraq basqa elde turaqty turatyn azamat – red.) Qarjy mınıstrliginiń memlekettik baǵaly qaǵazdaryna jáne Ulttyq banktiń notalaryna salǵan salymdary jıyntyqta 559 mlrd teńgege deıin artqan, ıaǵnı 178 mlrd teńgege ósken. Bul – 2022 jylǵy naýryzdan bergi eń joǵary mán. Beırezıdentterdiń notalarǵa qatysýy 6 mlrd teńgege, al Qarjy mınıstrliginiń memlekettik baǵaly qaǵazdaryna qatysýy 171 mlrd teńgege artypty.
Qarjy mınıstrliginiń oblıgasııalaryna salynǵan ınvestısııalar eń joǵary tarıhı deńgeıge deıin ósip, qazir 453 mlrd teńge boldy. О́tken jyly beırezıdentterdiń portfeldik ınvestısııalarynyń damýshy elderden áketilgeni baıqalǵan edi. Onyń áseri bizge de tıipti: 2022 jyly beırezıdentterdiń ketýi (-) 214 mlrd teńge boldy. Sol jyly halyqaralyq ınvestorlardyń táýekel sentımenti ózgergenin de kórip otyrmyz.
«Beırezıdentterdiń memlekettik baǵaly qaǵazdarǵa kelýinen naryqqa berer oń áseri týraly aıtar bolsaq, onda ınvestorlardyń, onyń ishinde sheteldik ınvestorlardyń aýqymdy shoǵyrynyń bolýy memlekettik baǵaly qaǵazdar naryǵynyń tıimdiligin arttyrady. Basqa elderdiń tájirıbesi kórsetkendeı, sheteldik portfeldik ınvestısııalardyń ákelinýi qaryz alý qunyn tómendetýge múmkindik beredi jáne qorlandyrýdyń qosymsha kózine aınalady», deıdi Ulttyq bank Monetarlyq operasııalar departamenti basqarmasynyń bastyǵy Oljas Iǵsatov.
Beırezıdentter Qazaqstannyń memlekettik baǵaly qaǵazdaryn satyp alý úshin aldymen bizdiń naryqta óz valıýtasyn satyp, teńgeni satyp alýy qajet. Osylaısha jyl basynan beri beırezıdentter shamamen 400 mln dollar satqan. Bul óz kezeginde valıýta naryǵynda qosymsha usynysty qamtamasyz etti.
«Sheteldik ınvestorlardyń qyzyǵýshylyǵy Ulttyq bank pen Qarjy mınıstrliginiń ózara belsendi kommýnıkasııalyq saıasatyna da baılanysty. Jyl basynan beri sheteldik ınvestorlarmen birqatar kezdesý ótti. Sonyń barysynda otandyq naryqtaǵy memlekettik baǵaly qaǵazdardyń keleshegi men tartymdylyǵy týraly aıtyldy. Sonymen qatar qazirgi ýaqytta memlekettik borysh naryǵynda bastapqy dılerler ınstıtýtyn engizý boıynsha jumys júrgizilip jatyr. Ol da naryqty damytýda jáne onyń ótimdiligin arttyrýda qosymsha qadam bolady», deıdi Ulttyq bank ókili.