«Zııatkerdiń» zerdeli shákirtteri

Atyraý oblysy ákiminiń orynbasary Jasulan Bısembıevtiń málimetinshe, bıyl 211 mekteptiń 11-synybyn 6 081 túlek bitirdi. Onyń ishinde 159 túlek «Altyn belgige» ıe bolǵan edi.

Sońǵy jyldary óńirde mamandandyrylǵan bilim ordalary kóbeıdi. Sonyń qatarynda 2021 jyly ashylǵan jaratylystaný baǵytynda jańa formatta bilim beretin «Zııatker» mektep-lıseı-ınternaty da bar. Bes júz oryndyq bilim ordasyna alǵashqy jyly 150 oqýshy qabyldandy. Bıyl ony alǵashqy 32 túlek bitirip shyqty.

– Mektep túlekteriniń bári de joǵary oqý ornynda memlekettik bilim grantymen oqyǵysy keledi. Alaıda grant tek mektepte alǵan sapaly biliminiń nátıjesin kórsetken zerdeli túlekterge beriledi. Máselen, Atyraý qalasyndaǵy «Zııatker» mektep-lıseı-ınternatynyń 28 túlegi memlekettik bilim grantyn ıelenip, joǵary oqý oryndarynyń stýdenti atanyp otyr. Grant ıelengender sany atalǵan mektep túlekteriniń 88 paıyzyn qurady. Bul – «Zııatker» mektebi úshin úlken abyroı ári sapaly bilimniń naqty kórsetkishi, –deıdi Jasulan Bısembıev.

Ulttyq testileý ortalyǵynyń dırektory Rýslan Emelbaevtyń aıtýynsha, Memleket basshysy atyraýlyq túlekterdiń joǵary bilim alýy úshin arnaıy grant bólýdi tapsyrǵan. Soǵan sáıkes, bıyl Atyraý oblysynyń mektepterin bitirgen túlekterge 1 500 nysanaly grant bólingen.

– Bul – tek Atyraý oblysynyń túlekterine bólingen grant. Máselen, pedagogıka salasyna 283, jaratylys­taný, matematıka jáne statıstıka baǵytyna – 49,­ aqparattyq-kommýnıkasııalyq tehnologııalar mamandyǵyna – 561, ınjenerlik, óńdeý jáne qurylys ındýstrııasyna 607 grant bólindi. Nysanaly grant konkýrsyna qatysatyn úmitkerler jalpy grant konkýrsyna da qujat tapsyra alady. Biraq nysanaly grant arqyly talapker tórt qalany jáne sol qaladaǵy joǵary oqý ornynyń barlyǵyn belgileýge múmkindigi bar, – deıdi Rýslan Emelbaev.

Jyl saıyn mektep túlekterine Atyraý oblysy ákiminiń granty berilip keledi. Bıyl ákim grantyn 240 túlekke berý kózdelip otyr.

Atyraý oblysy