О́ńirde úsh aýysymdy mekteptiń máselesi týraly keıingi jyldary jıi aıtylatyn. Oǵan bilim oshaǵynyń tapshylyǵyn qosyńyz. Jańa oqý jyly qarsańynda osy bir túıindi máseleler týraly tarqatyp aıtýdyń reti kelip tur.
Bilim oshaqtaryndaǵy oqýshy ornynyń tapshylyǵy Astananyń irgesindegi eldi mekenderde de bar. Bul turǵyndar sanynyń jyl saıyn eselep ósýine baılanysty. Búgingi tańda óńirde úsh aýysymda bilim beretin eki mektep – Arshaly aýdanyndaǵy Jibek joly aýylynyń mektebi men Qosshy qalasyndaǵy №2 bilim oshaǵy. Kúrmeýi qıyn osy túıindi sheshý úshin Jibek joly aýylynda 300 oryndyq, Qosshy qalasynda 1 200 oryndyq mektep qurylysy júrgizilip jatyr. Bilim oshaqtary osy jyldyń tamyz aıynda tolyq aıaqtalyp, oqýshylardy qabyldamaq.
Sondaı-aq apatty mektepterdiń de bar ekendigin aıta ketýge tıispiz. Mundaı mekteptiń sany – ekeý. Olardyń bireýi Jarqaıyń aýdanyndaǵy Birsýat aýylynda bolsa, ekinshisi Birjan sal aýdanyna qarasty Bulandy eldi mekeninde. Bulandy aýylynda 800 oryndyq mektep qurylysy júrgizilip jatyr. Jańa bilim oshaǵy 2023 jyly paıdalanýǵa beriledi dep mejelenip otyr. Al Birsýat aýylyndaǵy mektep ǵımaratyna kúrdeli jóndeý jumysyn júrgizý úshin jobalyq-smetalyq qujattama ázirlendi. Jańa jobanyń quny – 434,9 mln teńge. Qazir saraptamadan ótkizilý ústinde.
Osy jyly óńirde 4 052 oryndyq 10 bilim oshaǵy salynyp jatyr. О́ńirdegi bilim salasyna tyń serpin beretin qamqorlyq desek te artyq emes. Máselen, Qosshy qalasynda 1 200, Selınograd aýdanyna qarasty Shubar aýylynda 300, О́temis aýylynda 1 120, Jańajol aýylynda 80, Arshaly aýdanyna qarasty Jaltyrkól aýylynda 300, Kókshetaý qalasynda 300 jáne 1 200 oryndyq eki mektep salynbaq. Sondaı-aq Stepnogor qalasynyń irgesindegi Bestóbe kentinde 300 oryndyq bilim oshaǵy boı kótermek. Jańa oqý jylyna deıin uzyn-yrǵasy 2 092 oryndyq bes birdeı bilim oshaǵy paıdalanýǵa beriledi dep josparlanyp otyr. Osyndaı jaǵymdy jańalyqtarǵa jeke ınvestısııalar esebinen Qosshy qalasynda salynǵan 1 500 oryndyq mektepti qossańyz, bıylǵy jyly qyrýar sharýa atqarylǵandyǵyna kóz jetkizer edińiz.
Bilim salasyndaǵy ilgerileýge «Jaıly mektep» ulttyq jobasy septigin tıgizip jatyr. Mektepterdegi oryn tapshylyǵyn joıý maqsatynda óńirde 2025 jylǵa deıin 22,6 myń oqýshyǵa arnalǵan 18 mektep salý kózdelgen. Oıǵa alǵan sharýa ońynan ońǵarylsa, bilim salasy sony serpinge ıe bolmaq.
Aqmola oblysy