MAEK-te bolǵan apat saldarynan energııa bloktaryn jóndeý jáne elektr stansııasynyń toqtaý nátıjesinde óńirde energııa tutynýdy shekteý boıynsha ýaqytsha sharalar engizildi. Erteńnen bastap turǵyndarǵa josparly shekteýler boıynsha aldyn ala habarlanatyn bolady. Bul týraly Mańǵystaý oblysy ákiminiń birinshi orynbasary Jumabaı Qaraǵaev aıtty, dep habarlaıdy Egemen.kz atalǵan oblys ákimdiginiń baspasóz qyzmetine silteme jasap.
Aımaqtaǵy eldi mekenderdi birkelki jabdyqtaýdy qamtamasyz etý úshin ýaqytsha ajyratýlardy «tıimdi» ádispen júrgizý josparlanǵan. Bul belgili bir aımaqqa sáıkes tutynylatyn energııa kólemin azaıtý maqsatynda, tutynýshylar úshin elektr qýaty 3-ten 5 saǵatqa deıin sıkldik túrde óshiriletinin bildiredi. Turmystyq energııa tutynýshylaryna josparlanǵan úzilister jaıly aldyn-ala habarlanatyn bolady.
«MAEK» JShS-de elektr energııasynyń jalpy óndiris qýattylyǵy 545 MVt quraıdy. Alaıda eki elektr stansııasyndaǵy energetıkalyq blogtardyń májbúrli toqtaýyna baılanysty óndiris qýattylyǵy qazirgi tańda 245 MVt-qa deıin qysqarǵan.
Osy oraıda aımaq basshylyǵy memlekettik organdar jáne kommýnaldyq qyzmet ókilderimen birge eń aldymen áleýmettik obektilerdi elektr energııasymen qamtamasyz etý boıynsha jedel shtab qurǵan.
«Oblys basshylyǵynyń tóraǵalyǵymen qurylǵan jedel shtabqa ýákiletti memlekettik organdar men kommýnaldyq qyzmet ókilderi kirdi. Olar elektr energııasyn óshirý birinshi kezekte ónerkásiptik obektilerge áser etetini týraly sheshim qabyldady. Bul sheshim turmystyq energııa tutynýshylaryna yńǵaısyzdyq týdyrmaý úshin qabyldanyp otyr. Keıbir ken oryndary generatorlarmen jabdyqtalǵan, al basqa nysandarda jaǵdaı qıynyraq. Sonymen qatar aýrýhanalar, balabaqshalar sııaqty áleýmettik nysandar elektr qýatymen qamtamasyz etiletin bolady. Biz turǵyndardan arandatýshylyqqa boı aldyrmaýdy, tek resmı derekkózderge senýdi suraımyz», dedi «Mańǵystaý óńirlik elektr jelisi kompanııasy» AQ basqarma tóraǵasy Qasymhan Syzdyqov.
Jedel shtab otyrysynda tótenshe jaǵdaı rejımin engizý týraly másele qaraldy.
«TJ engizý týraly másele qaralýda. Ázirge bul shara tıisti nátıje bermeıdi dep esepteımiz, óıtkeni TJ rejımi tek memlekettik satyp alýǵa qatysty shekteýler engizýge múmkindik beredi. Bolǵan jaǵdaıda bizdi júıelik operator - «KEGOC» AQ qoldap otyr, ol bizge 80 mVt-qa deıin alýǵa kómektesedi», dep túsindirdi Jumabaı Qaraǵaev.
Qazirgi ýaqytta jedel shtab óńirde elektr energııasyn berýdi jedel qalpyna keltirý boıynsha jumys istep jatyr.
- «MAEK»-tegi apat joıylǵanǵa deıin óńir turǵyndaryn osy jaǵdaıǵa túsinistikpen qaraýǵa, elektr energııasyn únemdi tutynýǵa shaqyramyn. Kommýnaldyq qyzmet mamandary kúndiz-túni energııa bloktarynyń jumysyn tez qalpyna keltirý úshin jumys atqarýda. Búgin biz «tıimdi» óshirýdiń eń joǵary júktemelerin synaqtan ótkizip jatyrmyz, erteńnen bastap turǵyndarǵa barynsha yńǵaıly bolý úshin, eldi mekenderdi ajyratý kestesin aldyn-ala usynatyn bolamyz, - dep qorytyndylady Jumabaı Qaraǵaev.