Ortalyq kommýnıkasııalar qyzmeti alańynda Indýstrııa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Baýyrjan Qabdol 232 myń azamat ákimdikterdiń turǵyn úı alý kezeginen shyǵarylýy múmkin ekenin aıtty.
Brıfıngke IIDM Qurylys jáne turǵyn úı-kommýnaldyq sharýashylyq isteri komıtetiniń, Sıfrlyq damý, ınnovasııalar jáne aeroǵarysh ónerkásibi mınıstrliginiń Aqparattyq qaýipsizdik komıtetiniń, sondaı-aq Astana qalasy ákimdiginiń jáne «Ulttyq aqparattyq tehnologııalar» AQ departamentiniń ókili qatysty. Baspasóz konferensııasynda turǵyn úı kezeginiń bir júıege keltirilip, zańmen rettelgeli jatqany sóz boldy. Konstıtýsııaǵa sáıkes elimizde azamattardy turǵyn úımen qamtamasyz etý úshin jaǵdaılar jasalǵan. Zańda kórsetilgen sanattaǵy muqtaj azamattarǵa turǵyn úı zańymen belgilengen normalarǵa saı memlekettik turǵyn úı qorlarynan olardyń shama-sharqy kóteretin aqyǵa beriledi delingen.
Memlekettik qordan turǵyn úıdi alýdyń jalpy tártibi «Turǵyn úı qatynastary týraly» zańymen retteledi. Máselen, Astana, Almaty, Shymkent syndy megapolısterde turǵyn úı kezegine iligý úshin úsh jyldyq tirkelimińiz bolýy shart. Jalpy, memleket esebinen baspanaǵa qol jetkizý úshin jaǵdaıyńyz qoıylǵan talaptar men erejelerge sáıkes bolýy kerek. Qazirgi kúni qala ákimdikteri jasaǵan turǵyn úı kezekteriniń kóbi sol talaptar men erejelerge saı kelmeıdi. Atalǵan komıtetter men memlekettik organdar osy qatelikterdi túzeýge belsenip otyr. Nátıjesi – tómendegideı.
Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary B.Qabdol aıtqandaı, búginde turǵyn úı kezeginde 646 819 azamat tur eken. Keıingi jyldary olardyń qatary kún saıyn ulǵaıyp keledi. Aıtalyq, keıingi 10 jylda kezek 6 ese artypty.
«Anyǵyn aıtqanda, halyq tarapynan atalǵan kezekke baspanasy bar azamattar turyp jatqany týraly kóptegen shaǵym túsip jatyr. Osyǵan baılanysty bizdiń vedomstvo Sıfrlyq damý, ınnovasııalar jáne aeroǵarysh ónerkásibi mınıstrligimen birlesip, atalǵan tizimniń zań talaptarynyń sáıkestigine taldaý júrgizdi. Onyń nátıjesinde kezekte turǵan 96,1 myń azamattyń keıingi 5 jylda jeke baspanasy bolǵany, 533 adamda Qazaqstan azamattyǵy joq ekeni, 91,4 myńdaı adamnyń turǵylyqty jeri kezekke tirkelgen óńirmen sáıkes kelmeıtini, sondaı-aq 29 myń adamnyń sol mekenge tirkelmegeni jáne 15,6 myń adamnyń qaıtys bolyp ketkeni anyqtalyp otyr», dedi B.Qabdol.
Demek úı kezeginde turǵan 232 myńǵa jýyq azamattyń jeke derekteri zań talaptaryna saı bolmaǵandyqtan, tizimnen shyǵarýǵa týra keledi. Rasynda ákimdikter sáıkes kelmeıtin azamattardy kezekten shyǵarýdy bastaıdy. Nátıjesinde, naǵyz muqtaj jandar kezekke turady. Ádil qoǵam qurý úshin shynymen muqtaj azamattarǵa memleket tarapynan kómek kórsetý óte mańyzdy. Sondyqtan baspana kezeginde muqtaj azamattar ǵana turýy kerek.
Negizinde ádil qoǵam memlekettiń de, árbir azamattyń da ortaq jaýapkershiligi men ashyqtyǵy arqyly qalyptasady. Osylaısha, ár isti yjdahatpen túgendeý barlyq azamatqa qajet. Al kezekten shyǵarylatyn azamattar memleket kómeginiń shyn muqtaj jandarǵa jetýi kerek ekenin bilýi kerek.
«Atalǵan tizimdi túgendeý kezektiń qozǵalý úderisin jedeldetýge jáne rasymen de baspanaǵa muqtaj azamattardyń quqyǵyn kez kelgen oǵash, teris áreketterden qorǵaýǵa múmkindik beredi», dep sózin qorytty B.Qabdol.